Ministria e Shëndetësisë: vaksinat e gripit priten këtë muaj, vonesë për shkak të problemit global

Ministria e Shëndetësisë njofton se vaksinat për gripin sezonal për grupet e rrezikuara pritet t’i sigurojë gjatë këtij muaji, pas një vonese që ka burim në problemet e prodhimit në nivel global.

Sipas ministrisë, në tenderin e shpallur për blerje nuk ka ardhur asnjë ofertë, dhe theksojnë se shkaku nuk qëndron në procedurën e brendshme, por në një vendim të veçantë të autoriteteve shëndetësore ndërkombëtare.

“Këtë vit, për herë të parë u ndryshuan të trija llojet virale në përbërjen e vaksinës njëherësh (dy për gripin A dhe një për gripin B). Organizata Botërore e Shëndetësisë dhe agjencia amerikane FDA i përditësuan të trija variantet së bashku, çka vonoi fillimin e prodhimit te prodhuesit në mbarë botën,” shpjegon Ministria e Shëndetësisë.

Bashkëpunim rajonal dhe ndërkombëtar

Ministria shton se është në komunikim të vazhdueshëm me vendet e rajonit dhe partnerët ndërkombëtarë për të siguruar dozat e nevojshme përmes kanaleve ndërkombëtare. Ajo rikujton se vaksinimi mbetet mbrojtja më e sigurt kundër komplikacioneve për personat me sëmundje kronike, të moshuarit dhe gratë shtatzëna.

Shtetasit do të njoftohen veçmas për datën e saktë të nisjes së fushatës së vaksinimit, dhe prioritet do t’u jepet grupeve më të rrezikuara pasi të arrijnë dozat.

Foto: material shtypi nga ngjarja