Над 200 камери ќе детектираат диви депонии и вандализам во парковите во Скопје

Градот Скопје планира да постави над 200 камери низ територијата на градот кои ќе служат за детектирање создавање диви депонии и вандализам во јавните паркови, изјави градоначалникот. За да проектот тргне, се чека финално одобрување од Агенцијата за заштита на личните податоци.

Каде ќе бидат камерите

Орце Ѓорѓиевски рече дека камери ќе се постават на критични точки каде што се создаваат депонии и во паркови кои постојано се под удар. „Го чекаме финалното одобрување од Агенцијата за заштита на личните податоци. Повеќе од 200 камери ќе поставиме на критични точки низ Град Скопје. Ќе бидат опфатени места каде што се создаваат депонии и паркови кои постојано се под удар. Град Скопје не е на Орце, ниту на некоја политичка партија. Градот е на сите скопјани и како што си го чуваме својот дом, така треба да си го чуваме и градот“, изјави скопскиот градоначалник.

Како пример за повторувачки вандализам, Ѓорѓиевски го наведе фонтаната „Лотос“ во Градскиот парк и клупите околу неа. „Ја обновивме по толку години, прекрасно изгледа и тоа е еден од препознатливите белези на Град Скопје. Откако ја обновивме, трипати досега со графити ги исцртуваат клупите што постојано ги бојадисуваме“, рече тој.

Градоначалникот посочи дека средствата што се трошат за отстранување штети предизвикани од несовесно однесување би можеле да се употребат за други проекти. Покрај техничките мерки, додаде, општината ќе работи и на подигање на свеста кај граѓаните за зачувување на јавниот простор.

Според досегашните изјави, инсталирањето ќе почне откако Агенцијата за заштита на личните податоци ќе даде зелено светло; во говорот на градоначалникот не беше наведена конкретна временска рамка за поставувањето.

Фото: Фејсбук