Над 30 откупни центри под лупа на Комисијата за заштита на конкуренција – цени на пиперките и јаболката
Утврдени се можни индиции за прекршување, инспекторатот спроведе 873 контроли и изрече санкции.
Комисијата за заштита на конкуренцијата спроведе контроли во повеќе од 30 откупни центри во Гевгелија, Струмица, Кривогаштани и Ресен за да утврди дали откупувачите меѓусебно се договарале околу формирањето и намалувањето на откупните цени за пиперките и јаболката.
Можно договарање, анализата продолжува
„Комисијата информираше дека се утврдени можни индиции за прекршување и анализата продолжува. Министерството за земјоделство нема да се меша во нејзиното одлучување и ќе продолжи да ги користи сите законски механизми за заштита на законитоста и фер пазарни односи“, рече Борче Серафимовски, Министер за земјоделство, шумарство и водостопанство.
Државниот инспекторат за земјоделство соопшти дека до средината на септември извршил 873 контроли кај откупувачите и изрекол мерки и казни. Најчести утврдени неправилности биле вршење откуп без склучени договори со производителите, неисплатени обврски за откупените земјоделски производи, непочитување на роковите за исплата, неистакнување ценовници за откуп, непоседување верификувани мерни инструменти и вршење откуп без упис во Регистарот на откупувачи.
„Државните инспектори за земјоделство за утврдените неправилности имаат изречено вкупно 30 инспекциски мерки, за кои се издадени решенија во форма на забрани, опомени, наредби и задолженија. Дополнително, за утврдени неправилности при откупот, државните инспектори за земјоделство имаат издадено 17 платни налози, од кои три се платени, а за останатите кои не се платени се водат прекршочни постапки“, рече Ивица Ангеловски, директор на Државниот инспекторат за земјоделство.
Надлежните најавија дека контролите ќе продолжат и дека за утврдените неправилности ќе следуваат соодветни мерки. Министерот ги повика земјоделците да достават свои предлози за новиот предлог-закон за уредување на пазарите со земјоделски производи со кој ќе се воведат појасни правила за организираниот откуп.
Новинар: Тамара Марковска
Фото: прес-материјал од настанот
