Над 4.000 бомби пронајдени во старата касарна во Битола, помагаат тројца пензионери од МВР

Над 4.000 неексплодирани убојни средства се откриени на парцелата на старата касарна во Битола, објави Дирекцијата за заштита и спасување, откако при новите ископувања беше најден голем број на дополнителни направи. На терен се продолжува со чистењето и обезбедувањето на опасните предмети.

Колкава е опасноста и што е пронајдено

Според ДЗС, при тековната фаза се отстранети околу 1.700 рачни бомби и тромблонски мини од Првата светска војна на иста парцела каде во мај 2026 беа пронајдени 1.443 парчиња, со што вкупната бројка надмина 4.000 неексплодирани средства.

Директорот Стојанче Ангелов на прес-конференција во Битола рече дека со отстранувањето е отстранета голема опасност за куќите што се наоѓаат на 200 метри воздушна линија од местото, а ископувањата продолжуваат и се очекува да бидат пронајдени уште повеќе од 1.000 вакви бомби и други видови неексплодирани убојни средства.

За разлика од акцијата во пролетта, кога единствениот локален пиротехничар, Ѓорги Стефанов, сам ги вадеше бомбите, сега до него се тројца пензионирани припадници на Министерството за внатрешни работи. Двајцата се поранешни припадници на специјалната единица „Тигри“, а третиот е пензиониран од Отсекот за антитероризам; сите се ангажирани со договор на дело.

Ангелов посочи дека во Македонија остануваат само уште двајца професионално вработени пиротехничари кои треба да ја покријат целата територија според повиците што ги добиваат и дека се работи на решавање на кадровскиот недостиг.

Во неговите зборови: "Во овој момент во тек е процедура за вработување на уште еден пиротехничар кој што ги има сите потребни сертификати и соодветно искуство. Очекувам да биде вработен пред Нова година, размислуваме и во насока на пронаоѓање на нови кадри, работам на тој процес. Но, факт е дека никаде не можеме да најдеме готов производ, односно обучени пиротехничари, туку треба да примиме млади лица кои потоа ќе ја завршат обука која во најмала рака е тростепена за што потребно е повеќе од една и пол година."

Тој апелираше до граѓаните ако наидат на предмети кои наликуваат на бомба, граната или проектил веднаш да пријават на 112 за стручни лица да го подигнат убојното средство и предупреди: "Напоменувам дека иако навидум изгледаат стари и р'ѓави, овие бомби се исклучително убиствени, истите можат да бидат активирани при тресок на земја или бетон, а особено доколку бидат зафатени од оган."

Фото: СДК.МК)