Најскапиот стан во првата половина од 2026: 168.000 евра за 50 м² во Центар

Регистарот на цени и закупнини за пазарот на недвижности покажува дека во првата половина од 2026 година највисока цена по квадратен метар е регистрирана во општина Центар — 206.640 денари (3.361 евро) за квадратен метар.

Според нотарскиот акт, станот на кој се однесува оваа цена има вкупна површина од 50 квадрати — 46 квадрати станбена површина и 4 квадрати помошни простории — а вкупната купопродажна цена изнесува 168.000 евра.

Куќи и деловни простории на врвот на пазарот

Највисоко реализираната цена на куќа годинава е забележана во општина Карпош — вкупна вредност од 1.500.000 евра. Куќата е на земјиште со површина од 1.731 квадратен метар и објект од 575 квадратни метри.

Кај деловните простории, најголемата регистрирана трансакција е во општина Аеродром — речиси 6,8 милиони евра за објект со вкупна површина од 3.478 квадратни метри.

Просечните цени на становите во првото полугодие од 2026 година покажуваат различни нивоа по општини. За становите од стара градба највисоки просеци има во Центар — 1.547 евра/м², потоа во Аеродром — 1.532 евра/м² и Карпош — 1.523 евра/м². Кај становите од инвеститори највисоки се во Центар — 1.712 евра/м², потоа во Карпош — 1.167 евра/м² и Ѓорче Петров — 1.062 евра/м². Најниските просечни цени се евидентирани во Струмица — 719 евра/м² за стара градба и 689 евра/м² за станови од инвеститори.

Дополнително, државните органи пријавуваат дека тешко ја продаваат сопственоста запленета во периодот поврзан со Груевски и сега ги нудат становите со голем попуст.

Фото: Слободен печат / Драган Митрески