Banka Kombëtare: Nga 16 nëntori hapet degë e ALTA Bank në Prilep

Banka Kombëtare njoftoi se, duke nisur nga e Hëna, 16 nëntor, do të fillojë puna një degë e ALTA Bank AD Bitola në Prilep, me qëllim zgjerimin e mjetëve për qasje të klientëve ndaj shërbimeve bankare. Njoftimi u shpërnda nga Kabineti i Guvernatorit Trajko Slaveski.

Në degën e re të Prilepit, klientët që kanë llogari pagese, por nuk posedojnë kartë pagese, do të jenë në gjendje të tërheqin para në dorë deri në 20,000 denarë në një periudhë prej dy javësh, sipas kufizimeve të vendosura.

Degët tjera dhe akses në bankimin elektronik

Vazhdojnë të punojnë filialet e ALTA Bank në Strumicë dhe Tetovë, si dhe dega në Shkup në Qendrën Tregtare “Biser”. Në këto sportele klientët mund të tërheqin para brenda kufizimeve të vendosura, si dhe të kryejnë pagesa për shërbime komunale, shlyerje kredish dhe nevoja të tjera.

Si pjesë e masave për lehtësimin e qasjes në mjete dhe sigurimin e përmbushjes së detyrimeve të përditshme financiare, që nga 10 nëntori klientët mund të përdorin shërbimet e bankimit elektronik dhe mobil. Kufizimet e zbatueshme janë: deri në 15,000 denarë në javë për klientët me karta pagese, dhe deri në 20,000 denarë në periudhë dyjavore për klientët pa karta pagese.

Këto kufizime zbatohen në mënyrë të përbashkët për të gjitha llogaritë e klientit në bankë dhe përfshijnë të gjitha kanalet e pagesave dhe tërheqjeve: pagesat me kartë në tregti dhe online, tërheqjet nga ATM-të dhe në sportelet e degëve, si dhe pagesat përmes bankimit elektronik dhe mobil.

Njoftimi i Bankës Kombëtare sqaron gjithashtu se personat fizikë mund të disponojnë plotësisht me prurjet e reja në llogaritë e tyre në ALTA Bank AD Bitola nëse këto mjete vijnë nga llogari pagese të hapura te banka të tjera dhe ofrues të shërbimeve të pagesave; kjo do të thotë se qytetarët mund të përdorin fondet shtesë të kualifikuara pa kufizim shume.

Përsa i përket lehtësimeve për ndërmarrjet, është mundësuar pagesa e pagave së bashku me pagesën e tatimeve dhe kontributeve për ato kompani që gjatë tre muajve të fundit kanë paguar rregullisht pagat përmes llogarive pagese në bankë.

Foto: material shtypi nga ngjarja