НАТО размислува за зајакнување на нуклеарното одвраќање во Европа

НАТО планира да го зајакне нуклеарното одвраќање во Европа, со оглед на безбедносните закани што се поврзуваат со Русија под претседателот Владимир Путин. Во рамките на Алијансата се разгледуваат опции кои вклучуваат и можно дополнително распоредување американско нуклеарно оружје на европска територија.

Каде и какво оружје се разгледува

Експерти и аналитичари што ја следат темата велат дека можните мерки опфаќаат од зајакнување на постоечките капацитети за складирање и достава до распоредување дополнителни тактички нуклеарни сили поблиску до потенцијалните жаришта. Некои проценки упатуваат дека САД можеби веќе префрлиле бомби Б61-12 во воздушната база Лејкенхит во Велика Британија.

Ако безбедносната состојба понатаму се влоши, во плановите на НАТО како можни локации за распоредување тактичко нуклеарно оружје се разгледуваат и земји поблиску до Русија, меѓу кои Полска, Финска и Литванија.

Плановите главно се однесуваат на тако нареченото нестратешко (тактичко) нуклеарно оружје. Таквите бомби се наменети за употреба против непријателски војници, воздухопловни бази, пристаништа, командни центри и друга воена инфраструктура. Во споредба со стратешкото нуклеарно оружје, тие најчесто имаат помала разорна моќ и обично се носат со борбени авиони, ракети со пократок дострел и крстосувачки ракети.

Според проценките на експерти за нуклеарно оружје, по големото разоружување по завршувањето на Студената војна, во шест воздухопловни бази во Германија, Белгија, Италија, Холандија и Турција останале складирани околу стотина бомби Б61-12.

Генералниот секретар на НАТО, Марк Руте, во интервјуто дадено во средината на јули не ја исклучи можноста во иднина во Европа да бидат распоредени дополнителни американски нуклеарни сили. Тој одби да навлегува во детали за тековните проценки и консултации, повикувајќи се на доверливоста на процесот, и изјави дека НАТО постојано проценува кои способности му се потребни и како треба да изгледа структурата на нуклеарното одвраќање.

Фото: прес-материјал од настанот