Нинослава Јовиќ меѓународно гонета по кражбата на накит од 40 милиони евра

Холандската полиција преку Европол распиша меѓународна потерница по Нинослава Јовиќ (41) од Ниш, сомничена за помагачка улога во една од најголемите пљачки на накит во Европа.

Станува збор за филмската кражба на престижниот саем за уметност и антиквитети TEFAF во Маастрихт. Грабежот се случи на 28 јуни 2022 година, кога беше однесен накит проценет на 40 милиони евра.

Награди и имиња на осомничените

Нинослава Јовиќ е ставена на листата на најбарани бегалци во Европа; нејзината фотографија и детален опис се објавени на официјалните веб-страници на холандската полиција и Европол. Истражителите наведуваат дека моментално престојува во Србија, а последен пат била видена во родниот Ниш.

За информации што би довеле до нејзино апсење, холандското обвинителство нуди награда од 20.000 евра, додека осигурителна компанија нуди 600.000 евра за секоја информација што ќе помогне да се пронајде украдениот дијамантски накит.

Според полицијата, кражбата ја извршил четиричлен тим. Преправени како обични посетители на саемот, тие со чекани ги скршиле заштитните стаклени витрини и заминале со вредни парчиња, меѓу кои уникатен ѓердан со редок жолт дијамант чия вредност се проценува на 27 милиони евра.

Само мал дел од украдениот накит подоцна беше лоциран во Хонг Конг, Израел и Боцвана. Нинослава е една од петтемина српски државјани кои се бараат за ова дело; на потерниците се и Александар Цениќ (50), Александар Стојиљковиќ (50), Душко Димитријевиќ (50) и Братислав Стојановиќ (41). Истражителите сметаат дека четворицата мажи се дел од познатата криминална мрежа „Пинк Пантер“.

Холандските власти и Европол ги повикуваат сите кои имаат информации за Нинослава Јовиќ или за другите осомничени веднаш да се обратат во најблиската полициска станица.

Фото: прес-материјал од настанот