Нова општинска зграда во Тетово: проект за 28,5 милиони евра со јавно‑приватно партнерство

Општината Тетово денес ја отвори јавната расправа за планот на место на сегашната противпожарна станица да се изгради административно‑комерцијален комплекс, проект проценет на 28,5 милиони евра што повторно предизвика жестока расправа помеѓу опозицијата и градоначалникот Билал Касами.

На расправата, дел од присутните граѓани доставија конкретни забелешки на физибилити студијата која ја презентираше градоначалникот Касами.

Идејата на Општината е голема централизирана административна зграда во која би се сместиле повеќето служби и јавни претпријатија што сега работат во повеќе различни објекти. На локацијата каде сега се наоѓа Противпожарната единица, во состав на комплексот е планиран нов и модерен објект за тетовската Пожарна. Изградбата на целиот комплекс би требало да изнесува 28,5 милиони евра.

Спор околу финансирањето и уделите

За опозицијата и за дел од населението спорен е предложениот модел на финансирање. Градоначалникот Билал Касами рече дека јавно‑приватното партнерство е најдобрата опција за Општината. Според предлогот, Општината на почетокот ќе поседува 15% од објектот, уште 45% ќе ги отплаќа во период од 4 до 8 години во зависност од рокот на отплата што ќе го договори со изведувачот, а преостанатите 40% ќе бидат на изведувачот кој ќе го гради комплексот.

Овој предлог веќе предизвика контроверзии на претходната седница на Советот на Општина Тетово кога точката првпат беше на дневен ред, а денешната јавна расправа не ги отстрани несогласувањата. Следните постапки ќе зависат од натамошните одлуки на општинските органи.

Фото: СДК.МК)