Нови детали за несреќата во која беше повредена претседателката Наташа Пирц Мусар

Словенечката полиција објави дополнителни информации за сообраќајната несреќа минатиот петок во која учествуваше претседателката Наташа Пирц Мусар додека се враќала од Хрватска.

Одговорните наведуваат дека судирот е предизвикан поради неодржување на потребното безбедносно растојание во официјалниот конвој. Според полицискиот извештај, 52-годишниот возач на Mercedes V300 во кој патувала претседателката не држел доволно растојание и со предниот дел од возилото удрил во задниот дел на Audi, кој бил дел од службената придружба и кој го управувал 34-годишен возач.

Постапка и тестирања

Тестовите за алкохол и дрога кај двајцата возачи биле негативни. Возачот кој го управувал автомобилот на претседателката е осомничен за предизвикување сообраќајна несреќа од небрежност. Полицијата потврди дека го известила надлежното одделение на Специјализираното државно обвинителство и му ја доставила целата документација, а постапката се води според член 323 од словенечкиот Кривичен законик.

Несреќата се случила во петокот, малку пред 17 часот, во тунелот Кастелец на автопатот во правец кон Љубљана. Претседателката се здобила со полесни повреди, а според неофицијални информации, ја скршила клучната коска.

Една од нејзините две придружнички се здобила со тешки повреди. Покрај возачот, во возилото имало уште четири лица: претседателката, обезбедување и две придружнички. Повредените биле пренесени во Општата болница Изола, а Кабинетот на претседателката соопшти дека Пирц Мусар била пуштена на домашна нега во саботата.

Вкупната материјална штета се проценува на околу 37.000 евра.

Фото: Наташа Пирц Мусар - Фејсбук