Обвинителен предлог за смртта на работникот во Охрид, опфатени две лица и две фирми
ОЈО Охрид тврди дека отворот за лифт не бил обезбеден, а работникот бил ангажиран без договор и без безбедносна обука.

Основното јавно обвинителство Охрид поднесе обвинителен предлог против две физички и две правни лица за смртта на работникот Кристијан Љушев, кој паднал во необезбедено окно за лифт во зграда во изградба.
Обвинителството наведува дека отворот за лифт не бил обезбеден со ограда, а дека починатиот бил ангажиран без договор за вработување и без обука за безбедност при работа.
Несреќата, според обвинителниот предлог, се случила на 12 јануари наутро кога четворица работници влегле во објектот носејќи дел од мебел. На четвртиот кат, Љушев се сопнал од кофа оставена во ходникот, изгубил рамнотежа и паднал низ отворот за лифт до подрумските простории. Од здобиените повреди починал на самото место.
Обвинувања кон одговорното лице и фирмата што ги ангажирала работниците
Во обвинителниот предлог се вели дека одговорното лице кај инвеститорот не го обезбедило отворот за лифт, не поставило огради на скалите и не го осигурило влезот за да се спречи пристап на неовластени лица. На градилиштето, како што е нотирано, имало и градежен шут и отпад.
Со обвинителниот предлог се опфатени и фирмата што ги ангажирала работниците и нејзиниот управител. Обвинителството посочува дека Љушев работел како помошник-монтер без да биде пријавен, без здравствен преглед и без упатства за безбедно работење. Работниците добиле устен налог од управителот, без претходен увид и процена на ризиците на работното место.
Обвинението ги опфаќа тешките дела против општата сигурност, предизвикување општа опасност, повреда на правата од работен однос и непреземање мерки за заштита при работа. Обвинителот побарал од Основниот суд во Охрид да им забрани статусни промени на двете фирми во текот на постапката.
Фото: прес-материјал од настанот


