Од БРТ до „Љубљанска“ и „Лимак“: Големи инфраструктурни проекти за ново сообраќајно Скопје

Градот Скопје ја претстави новата серија сообраќајни проекти кои треба да ја трансформираат урбаната мрежа: проект за брз автобуски превоз (БРТ), ставање во функција на мостот на „Љубљанска“ и изградба на подземна сообраќајница кај комплексот „Лимак“.

Градоначалникот Орце Ѓорѓиевски изјави дека проектот за БРТ се наоѓа во завршната фаза на одобрување од Европската банка за обнова и развој (ЕБОР) и дека во следните неколку дена ќе биде распишан тендер за проектирање и изведба. „Работиме во целосна координација и поврзаност со ЕБОР, а тендерската постапка ќе биде спроведена во согласност со европските регулативи. Очекувам во текот на наредните неколку дена да биде објавена тендерската постапка“ – истакна Ѓорѓиевски.

Календар на активности и заштита на зеленилото

Од Градот посочуваат дека трасата на БРТ ќе го задржи постојното средишно зеленило на булеварите, со што модернизацијата на јавниот превоз ќе се спроведува паралелно со заштита на животната средина. По завршување на тендерската постапка и изборот на изведувач, градоначалникот очекува градежните работи да започнат доцна напролет следната година со поставување на камен-темелник и официјален старт на теренската изградба.

Како посебен инфраструктурен зафат градот го издвојува ставањето во функција на мостот на улицата „Љубљанска“, кој ќе создаде нова сообраќајна врска меѓу улицата „Љубљанска“ и улицата „Скупи“. „Овој проект предолго беше во застој. Нашата цел е да го активираме и да го ставиме во функција, бидејќи мостот на ‘Љубљанска’ ќе значи нова и подобра сообраќајна поврзаност за граѓаните на Скопје“ – нагласи Ѓорѓиевски.

Подземната сообраќајница покрај „Лимак“ е означена како стратешки објект кој, според сообраќајните анализи и физибилити‑студијата, треба да го намали метежот во градот за најмалку 33 проценти. Проектот за булеварот „Македонија“ и подземната сообраќајница е проширен од првично предвидената прва фаза до целосна реализација откако финансиската дисциплина овозможила пренамена на остварените заштеди. Првичната проценка изнесувала 1,1 милијарда денари, а избраниот изведувач добил договор од 750 милиони денари со ДДВ.

Градежните активности на делницата од Кисела Вода кон тунелите веќе почнале и треба да завршат до крајот на следната година. Во оваа фаза се предвидени два нови кружни тека — еден кај МВР, кој ќе ги поврзе улиците „Огњан Прица“ и „Јордан Мијалков“, и втор кон „Рамстор“ и Центарот. Кај МВР ќе се изгради и нова пумпна станица за да се реши долготрајниот проблем со поплавувања при пообилни врнежи. За време на градежните работи улицата „Јордан Мијалков“ ќе стане двонасочна, а другиот излез од тунелот ќе биде кај „Нова Македонија“ и ќе се поврзе со кружен тек и проширување на лента кон Цветниот пазар до Католичката црква. Процесот на експропријација во делот на Кисела Вода е при самиот крај, а за лицата кои би требало да се дислоцираат кај Цветниот пазар ќе бидат обезбедени соодветни алтернативи.

Фото: прес-материјал од настанот