Османи во Париз побара засилена француска поддршка за европската перспектива и Охридскиот договор

Потпретседателот на Демократската унија за интеграција, Бујар Османи, оствари низа средби во Париз со членови на францускиот Сенат, Националното собрание и со други француски институции за да ја разгледа европската перспектива на Северна Македонија и случувањата во Западен Балкан.

Во фокусот на разговорите беше застојот во евроинтеграцискиот процес на земјата, како и предлозите за постепена усогласеност со политиките на Европската Унија за да се обезбедат конкретни придобивки за граѓаните уште пред полноправното членство.

Османи побара засилен ангажман од Франција со цел да се обезбеди јасно, единствено и недвосмислено толкување на европскиот интеграциски процес во земјата, и поддршка во рамки на односите со Бугарија.

Охридскиот договор како столб на стабилноста

За време на средбите, Османи посвети посебно внимание на Охридскиот рамковен договор како темел на стабилноста, еднаквоста и мултиетничкиот карактер на државата. Тој ја искажа загриженоста за појавите што влијаат на јазичните права, правичната застапеност и почитувањето на основните принципи на договорот.

„Не треба да дозволиме Северна Македонија да остане настрана од клучните европски процеси во регионот. Премногу е направено, би рекол инвестирано, особено од страна и на Француската Република во овој процес, за што сме особено благодарни, но очигледно ни е потребна дополнителна поддршка, со цел интеграциите да продолжат", истакнал Османи.

Од ДУИ соопштија дека посетата на Париз е дел од континуираниот ангажман за дијалог со европските партнери околу перспективата на земјата и прашањата од значење за регионот, нагласувајќи дека спроведувањето на Охридскиот договор и напредокот кон ЕУ се тесно поврзани со стабилноста и иднината на Северна Македонија.

Фото: прес-материјал од настанот