Осум лица осомничени за шверц на цигари, лекови и производи за потенција; пронајдени пари и злато

Обвинителството за гонење организиран криминал и корупција отвори истрага против осум лица осомничени за шверц на цигари, нелегална продажба на лекови и производи за подобрување на сексуалната функција и потенцијата.

Како што стои во предметот, клучни докази биле добиени од мобилниот телефон на првоосомничениот, одземен во јануари годинава. При претрес во неговиот дом, во две метални сеф-каси скриени во спуштен плафон, биле пронајдени 86.200 евра и 16 плочки со златна боја. Во неговото возило биле пронајдени дополнителни 6.465 евра и 62.000 денари. Обвинителството наведува дека шверцот на цигари траел од 2024 до 2026 година.

Мрежа и внатрешна помош

„Во криумчарењето му помагале повеќе осомничени, меѓу кои и царински службеник кој го информирал за своите смени, лентата на која бил распореден и за засилените царински контроли, овозможувајќи непречено пренесување на стоката. Криумчарените цигари потоа биле пуштани во промет без акцизни марки, а дел од осомничените ги купувале и препродавале иако знаеле дека потекнуваат од криумчарење.“, соопштија од Основното јавно обвинителство за гонење организиран криминал и корупција.

Од обвинителството информираат дека осомничените неовластено увезувале, складирале и нуделе на продажба лекови и производи за потенција.

„При претресите биле пронајдени поголеми количини препарати наменети за третман на дијабетес, срцеви и кардиоваскуларни заболувања, невролошки и психијатриски состојби, ревматолошки и автоимуни заболувања, заболувања на дишните патишта и воспалителни заболувања на цревата, како и антибиотици, кортикостероиди, хормонски препарати, инсулини, антикоагуланси и бензодиазепини. Пронајдени се и „KAMAGRA oral jelly“, кој се издава со лекарски рецепт, како и други производи за подобрување на сексуалната функција и потенцијата во форма на таблети, гелови, пасти, мед и чоколади.“, информираа од Основното јавно обвинителство за гонење организиран криминал и корупција.

Првоосомничениот, според обвинителите, ветил и предал пари на царински службеник што работел на граничниот премин Богородица за да пропушта возило без контрола. Пари за поткупот му ги предал турски државјанин кој исто така се гони во случајот.

При претресите кај другите осомничени биле одземени цигари и други стоки за кои постои сомнение дека потекнуваат од криумчарење. МВР утврдило дека првоосомничениот и уште еден осомничен се од Тетово, а останатите се од Скопје, Гевгелија и двајца се државјани на Турција. При првата акција во јануари кај првоосомничениот биле пронајдени и количини цигари, како и 30.000 канадски долари, 35.000 австралиски долари, 12.950 евра и 69.000 денари.

Обвинителството соопшти дека истрагата продолжува и дека ќе ги гони лицата кои се вклучени.

Фото: прес-материјал од настанот