Парадоксално, ама реално: маркетите продаваат поевтино овошје и зеленчук од пазарите

Непишаното правило дека пазарите секогаш се поевтини од маркетите ова лето се покажа како сè поподложно на промена. Според споредба на цените на неколку скопски пазари и трговски синџири, за многу побарувани сезонски овошја и зеленчуци маркетите во моментов нудат пониски цени.

Од пазари што беа опфатени со споредбата, поевтин најчесто излегува Зелениот пазар во Скопје, на Бит-пазар цените се нешто повисоки, додека пазарот Буњаковец бележи највисоки суми во прегледот, со Аеродром веднаш зад него.

Од она што може да се види на тезгите, цените на овошјето се: праски 60–70 денари за килограм, нектарини по 70 денари, сливи 60–70 денари, кајсии од 70 до 100 денари во зависност од квалитетот и грозје 70–80 денари за килограм.

Кај зеленчукот, попопуларниот „јабучар“ домат се продава по 100–120 денари за килограм, додека обичниот домат на некои тезги е на акција – три килограми за 100 денари. Краставиците чинат околу 40 денари, благата пиперка 100 денари, лутата 60 денари, а лубеницата се продава по 20 денари за килограм.

Промоциите и големата набавка ја менуваат играта

Во маркетите, пак, дел од овие производи се нудат по значително пониски цени: праски и нектарини по 60 денари/кг, сливи по 55 денари/кг, домати по 50 денари/кг, благи пиперки по 65 денари/кг, лути пиперки по 50 денари/кг, тиквички по 20 денари/кг и дињи по 50 денари/кг.

Најголема е разликата кај доматите: додека „јабучар“ доматот на пазарите се продава и до 120 денари/кг, во маркетите доматите можат да се најдат и за само 50 денари/кг. Значајна е и разликата кај благата пиперка — околу 35 денари — како и кај праските и нектарините.

Економските аналитичари велат дека ова не е изненадување: „Во последниве години трговските синџири често нудат пониски цени за дел од производите. Големите количини, организираната логистика и честите промоции им овозможуваат да бидат поконкурентни – велат тие.“

Земјоделците, пак, предупредуваат дека не можат бескрајно да ги намалуваат цените: „Ѓубривата, горивото, работната сила, водата за наводнување, сè е поскапо. Луѓето мислат дека земјоделецот ја одредува цената како што сака, но зад секој килограм овошје и зеленчук стојат месеци работа и големи вложувања – вели земјоделец од Стајковци.“ Од маркетите посочуваат дека во летниот период редовно организираат акции: „Секојдневно работиме на тоа да обезбедиме конкурентни цени и квалитетни производи. Во летната сезона честопати организираме промотивни понуди за овошје и зеленчук, што дополнително ги намалува цените – велат во еден скопски маркет.“

Пазарџиите потсетуваат дека цената не е единствен критериум: „Кај нас луѓето купуваат затоа што знаат од кого го земаат производот. Го гледаат, го допираат, пробуваат овошје, разговараат со продавачот. Домашниот производ и свежината не можат секогаш да се споредуваат само преку цената – велат на пазарот во Аеродром.“ За многумина врската со проверен производител и непосредната свежина сепак го прават пазарот прв избор, иако автоматската претпоставка дека пазарот е најевтиното место полека се распаѓа.

Фото: Слободен печат / Драган Митрески