Пелистер доби 17 дигитални траси со GPS за планинари и велосипедисти

Планинарите и велосипедистите кои го посетуваат Националниот парк „Пелистер“ од сега ќе можат полесно да се ориентираат по патеките: на новата веб-страница на Паркот се објавени дигитални траси за 17 рути, од кои 13 се планинарски, а четири се велосипедски.

Посетителите можат да ги преземат ГПС-датотеките на своите паметни телефони или на ГПС-уреди и да ги вчитуваат во апликации за навигација, што помага при следењето на трасите, мерењето на растојанијата и проверката на висинските промени.

Технички решенија и податоци за рути

Националниот парк изврши интеграција со специјализираната платформа Outdooractive, преку која трековите се достапни директно или преку веб-страницата на Паркот. За секоја рута се обезбедени дигитални мапи, траси и практични податоци како висински профили и растојанија.

„Направивме интеграција со специјализираната платформа Outdooractive наменета за планинари и велосипедисти, преку која корисниците ќе можат да пристапуваат до рутите директно или преку веб-страницата на Националниот парк. Достапни се дигитални мапи и траси, како и детални информации за рутите, висинските разлики и растојанијата. Секој корисник може да ја преземе ГПС-датотеката со рутата на својот паметен телефон или ГПС-уред и да ја користи за полесна навигација по патеката. Во иднина ќе го зголемуваме бројот на рути“, рече Петар Михајловски, информатичар, кој заедно со Андреа Соколовски и Националниот парк повеќе од една година работел на изработката на новата веб-страница.

Пелистер, според паркот, е првата туристичка дестинација во државата што обезбедува ГПС-датотеки за навигација по речиси сите планинарски и велосипедски патеки. Како што најавуваат, бројот на дигитални рути ќе продолжи да се зголемува во наредниот период.

Фото: СДК.МК)