Slavjanka Petrovska nderohet në Kiev me Urdhrin e Princeshës Olga, i klasës së parë

Ish-ministrja e Mbrojtjes dhe aktualisht deputetja Slavjanka Petrovska sot në Kiev u nderua me Urdhrin e Princeshës Olga, i klasës së parë. Dekorimi i ishte dhënë nga presidenti i Ukrainës, Volodymyr Zelensky, në vitin 2023 për kontributin e saj personal në forcimin e kapaciteteve mbrojtëse të Ukrainës gjatë mandatit të saj si ministre e Mbrojtjes e Maqedonisë së Veriut.

Vlerësimi iu dorëzua nga zëvendës-kreu i Zyrës së Presidentit

Urdhrin ia dorëzoi Igor Zhovkva, zëvendës-kreu i Zyrës së Presidentit të Ukrainës. Petrovska i shprehu mirënjohje Presidentit Zelensky dhe theksoi se Ukraina dhe ukrainasit mund të vazhdojnë të llogarisin në mbështetjen e saj parimore.

Në një postim në Facebook Petrovska shkroi: "Këtë vlerësim nuk e perceptoj vetëm si personal. Është një vlerësim edhe për shtetin tonë, për profesionistët në mbrojtje dhe për vendimet me të cilat Maqedonia tregoi se është një aleat parimor dhe i besueshëm. Kur Ukraina u sulmua, ne nuk zgjodhëm heshtjen. Ne qëndruam në krah të së drejtës ndërkombëtare, sovranitetit dhe së drejtës së çdo shteti për të mbrojtur lirinë e vet. Kur mbrojmë të drejtën e Ukrainës për liri dhe sovranitet, ne mbrojmë të njëjtin rend ndërkombëtar që mbron edhe shtetet e vogla si i yni."

Gjatë vizitës Petrovska dhe Zhovkva diskutuan edhe për nevojat aktuale të Ukrainës. Zëvendës-kreu i zyrës së presidentit shprehu pritshmëri që Maqedonia e Veriut do të vazhdojë mbështetjen për Ukrainën si në nivel bilateral, ashtu edhe brenda iniciativave ndërkombëtare.

"Ne e vlerësojmë mbështetjen e Maqedonisë së Veriut për krijimin e një Tribunali Special për Krimin e Agresionit ndaj Ukrainës dhe për përpjekjet ndërkombëtare për kompensimin e humbjeve të shkaktuara nga Rusia, dhe mezi presim ratifikimin e konventave ndërkombëtare përkatëse nga parlamenti," tha Zhovkva gjatë takimit.

Zhovkva po ashtu ngriti çështjen e njohjes së Holodomorit si gjenocid nga parlamenti maqedonas, duke e vlerësuar këtë veprim si një hap të rëndësishëm drejt rikthimit të drejtësisë historike, dhe falënderoi për mbështetjen e deritanishme të vendit në luftën e Ukrainës kundër agresionit rus.

Foto: Slavjanka Petrovska (Fejsbuk)