По невремето: блокирани патишта, прекини на струја и повеќе од 50 пријавени штети

Пороен дожд, силен ветер и грмежи синоќа погодија делови од североисточниот и источниот регион на земјата, оставајќи расфрлани делови од покривни конструкции по улиците, паднати гранки и дрвја, блокирани патишта и дефекти на електричната мрежа.

Засегнати беа Куманово, Крива Паланка, Делчево, Виница и околните населени места, но најсериозно беше во Кочани, каде службите и денеска се на терен и работат на санирање и нормализирање на состојбата.

Во Кочани делови од градот беа без електрична енергија, а сообраќајот на магистралниот пат Кочани–Штип беше во прекин поради наноси и паднати дрвја на коловозот; блокирани беа и неколку патни правци околу градот, а стопиран беше и сообраќајот на излезот кон Виница.

Екипи на терен

Грозданов информира и дека во текот на ноќта биле пријавени повеќе од 50 штети и ги повика сите граѓани кои имаат предизвикано штети од синоќешното невреме истите да ги пријават во Општината, по електронски пат или директно преку едношалтерскиот систем. Сериозна е и состојбата во Облешево, каде по невремето има прекин во снабдувањето со електрична енергија.

Локалната самоуправа на Чешиново‑Облешево соопшти дека со сите расположливи ресурси е на терен за расчистување и што побрзо нормализирање на состојбата. Екипите на ЕВН работат на оштетените далеководи и се очекува во текот на денот да се врати електрична енергија до населените места.

И Пробиштип синоќа повторно беше зафатен од силното невреме, при што на повеќе локации беа предизвикани штети; службите продолжуваат со работа на терен, а поради невремето во пробиштипскиот регион денеска има прекин на водоснабдувањето во Штип.

Невремето откажа и неколку музички настани кои требаше да се одржат синоќа; тие се презакажани за денес зашто беше потребно да се проверат сценската и техничката опрема и да се обезбедат услови за безбеден настап. Иако врнежите значително ја намалија опасноста од ширење пожари во погодените области, остануваат сериозни проблеми со инфраструктурата и електроснабдувањето, а сè уште нема целосна проценка на материјалната штета.

Фото: прес-материјал од настанот