Почна распределбата на картичките за зелена нафта за земјоделците

Министерството за земјоделство, шумарство и водостопанство ја почна распределбата на картичките за зелена нафта за земјоделците, соопшти ресорното министерство. Министерот Борче Серафимовски рече дека мерката доаѓа во критичен момент, пред есенските земјоделски работи и сеидбата.

Први картички поделени во Свети Николе и Битола

За мерката се обезбедени вкупно 48 037 картички во вредност од 584 милиони денари (околу 9,5 милиони евра). Поддршката се реализира преку Програмата за финансиска поддршка во земјоделството за 2026 година, а висината на правото за секој корисник се определува според површините и културите пријавени во барањата за директни плаќања во 2025 година.

Помошта се движи од 3 200 до 12 000 денари по хектар, во зависност од групата култури. Министерот Серафимовски нагласи дека паричната поддршка доаѓа во период кога земјоделците имаат непосредни трошоци за подготовка на почвата, набавка на семенски материјал и ѓубрива, како и за одржување на механизацијата.

„Финансиската поддршка започна да стигнува до земјоделците во период кога имаат потреба за вложување во есенската подготовка на почвата, за купување на семенски материјал и ѓубрива, како и за одржување на механизацијата. Приходите од родот доаѓаат подоцна, а трошоците се прават сега. Затоа, зелената нафта има непосредна практична вредност за секој земјоделец во државата“, изјави денеска министерот за земјоделство.

Серафимовски го образложи и распоредот на износите по култури: „За пченица, јачмен, пченка, ориз и другите култури во таа група изнесува 3 200 денари по хектар. За сончоглед, маслодајна репка, луцерка и останатите култури во соодветната категорија е 4 800 денари по хектар. За градинарските култури опфатени со мерката и за лозови насади се предвидени 9 600 денари по хектар. За јаболка, круша, слива, праска и другите овошни култури во оваа група износот е 12 000 денари, а за дуња, калинка, бадем, лешник и останатите култури во нивната категорија 8 800 денари. За тутунот помошта е 11 000 денари, а за оревите и питомите костени 6 000 денари по хектар“, изјави Серафимовски.

Првите картички се поделени утринава во Свети Николе и во Битола, каде земјоделците добија почетни трансфери.

Фото: MЗШВ