Потрес: Убиен Давид Овори, капитенот на СЦ Вила

Фудбалската јавност во Уганда и пошироко е погодена од веста дека Давид Овори, капитенот на актуелните прваци СЦ Вила, беше смртно нападнат и потоа почина поради потешки повреди.

Според локалните извештаи, нападот се случил во вторник околу 20 часот во населбата Макиндие во Кампала, додека Овори се враќал кон својот дом. Нападателите, непознати лица, го претепале со камени коцки, го ограбиле и го оставиле без свест на улица.

Случајни минувачи го пронашле тешко повредениот фудбалер и го однеле во блиска клиника, од каде што итно бил транспортиран во болницата „Кејс клиник“. И покрај максималните напори на лекарите, тој им подлегнал на повредите.

Интензивна истрага на полицијата

Полицијата ја потврди неговата смрт и соопшти дека е отвoрена сеопфатна истражна постапка за пронаоѓање и приведување на сторителите. „Во моментов трагаме по напаѓачите и спроведуваме сеопфатна истрага. Уште ги утврдуваме точните околности под кои се случил нападот, како и деталите за тоа што точно му е одземено. Повеќе официјални информации ќе бидат соопштени по завршувањето на истражните дејствија“, изјави Лук Овојесигире, заменик-портпарол на полицијата за метрополитенската област Кампала.

Клубот СЦ Вила излезе со емотивно соопштение и побара брзо откривање и казнување на одговорните. „Длабоко сме потресени поради трагичниот губиток на нашиот капитен Давид Овори. Тој беше исклучителен фудбалер, ценет лидер и човек целосно посветен на играта. Изразуваме најдлабоко сочуство до неговото семејство, пријателите, соиграчите и сите љубители на фудбалот“, порачаа од клубот.

Овори ја носеше капитенската лента на СЦ Вила во сезоната 2025/26 и важеше за еден од најискусните и највлијателните играчи во екипата. Трагичниот инцидент остави празнина во угандискиот фудбал додека истрагата продолжува.

Фото: прес-материјал од настанот