Пожар се приближи до куќи во Зелениково — жители и доброволци го сопреа огнот

Голем пожар се приближил до куќите над селото Зелениково на утринските часови; по реакцијата на жители, градоначалник и доброволци, огнот бил сопрен пред да предизвика сериозна материјална штета, изјави директорот на Дирекцијата за заштита и спасување.

Директорот Стојанчe Ангелов кажа дека ноќта добил вознемирен повик од жителка чиј дом се наоѓа во последниот ред на ридот над Зелениково.

"Ноќва околу 2 часот по полноќ на телефон ми се јави женско лице со силно вознемирен глас. Најпрво ми се претстави а потоа во паника, со викање, ме извести дека пожарот се приближува кон нејзината куќа која се наоѓа во последниот ред, на ридот над Зелениково, поради што панично бараше помош."

Итна мобилизација: општинско возило, доброволци и соседи на терен

Ангелов рекол дека веднаш го известил дежурниот скопски пожарникар и дека возилото од станицата во Драчево итно тргнало кон локацијата. Тој самиот, кој се враќал од Македонски Брод преку ловиштето Јасен поради завршни работи на друг тешко пристапен пожар, се упатил кон Зелениково.

"Половина час подоцна пристигнавме на критичното место." Градоначалникот на Општина Зелениково, Коста Маневски, веднаш го стартувал општинското противпожарно возило и, заедно со припадниците на доброволното противпожарно друштво од Зелениково, излегол непосредно до куќите каде што беснел пожарот.

Жителите исто така помогнале: направиле делумна заштита на неколку места, прскајќи со вода и сечејќи критични грмушки и дрвја. Заедно со пристигнатите пожарникари успеале да го сопрат огнот пред тој да стигне до првите куќи.

Ангелов посочи дека е особено благодарен на доброволните пожарникари од Зелениково и дека договорил тие да влезат во Тимовите за брз одговор на ДЗС. "Со нив договорив да влезат во Тимовите за брз одговор на ДЗС а во знак на поддршка на доброволното пожарникарство им понудив Дирекцијата да им обезбеди заштитни униформи, противпожарни напртњачи и метли за нивниот иден Огнен тим во ДЗС. Благодарност и до скопските пожарникари чие што возило стигна навистина брзо. Сите заедно ставија крај на оваа огнена стихија која можеше да уништи повеќе куќи. На крај, по којзнае кој пат, ве молам, внимавајте! Доволна е само искра за вистинска катастрофа!" - нагласува Ангелов.

Фото: прес-материјал од настанот