Пожарот во Кран‑Монтана ги разгоре сомнежите за корзиканската мафија во Швајцарија

Пожарот во барот „Ле Констелејшн“ во Кран‑Монтана, во кој загинаа 41 лице на почетокот од оваа година, повторно ја отвори јавната и полициската дебата за врските меѓу корзиканските криминални кругови и Швајцарија.

Истражните документи и сведоштва собрани по трагедијата укажуваат дека клановите со децении користеле швајцарски банки, правни лица, трговија со луксузни часовници и моторни трки за перење милиони евра.

Сопственици во фокусот на истрагата

Сопствениците на локалот, Жак и Џесика Морети, се предмет на истрага за тоа како во само неколку години успеале да изградат угостителска империја без да го пријават почетниот капитал. Жак Морети е поранешен осуденик за подведување; од 2010 до 2014 година го водел кабарето Лолапалоса на Корзика, во област под силно влијание на кланот „Петит Бар“.

Досега нема директни докази дека Морети учествувал во нелегални активности. Сепак, банките поврзани со неговите сметки во јануари испратиле извештаи за сомнителни трансакции до Швајцарската канцеларија за спречување перење пари, а во извештај доставен до обвинителството во кантонот Вале е нотирано нетранспарентно книговодство и не е исклучена можноста за врски со корзиканската мафија. Француските власти подоцна побарале иста документација.

Италијанскиот новинар и експерт за мафија Роберто Савијано по трагедијата изјави дека верува оти корзиканската мафија е поврзана со случајот, објаснувајќи дека мафијашките компании често не се поставуваат за класичен профит, туку за да апсорбираат пари и да овозможат внесување нелегален капитал во легалната економија. Корзиканскиот обвинител Жан‑Филип Навар, кој повеќе од 20 години се занимава со организиран криминал, посочува дека корзиканските кланови имаат врски со Швајцарија со децении.

Според обвинителството и експертите, корзиканските криминални мрежи инвестирале таму каде што географската оддалеченост, недостатокот на транспарентност и финансиските погодности им овозможувале анонимност и работа далеку од дофатот на француската правда. Трагедијата во Кран‑Монтана ја врати во фокус дилемата дали алпските одморалишта служат и како платформи за прикривање и легализација на нелегални пари.

Фото: Fabrice COFFRINI / AFP / Profimedia