Превозниците во контакт со Владата — можно блокирање на премините од 14 септември

Превозниците од Северна Македонија се во континуирана комуникација со Владата за да добијат прецизна слика што може да очекуваат од Брисел во врска со можното олеснување на правилото 90/180, и дури потоа ќе донесат одлука дали ќе ги реализираат најавените блокади на граничните премини.

Според информации од домашни медиуми, оваа недела е очекувана средба помеѓу превозниците и вицепремиерот Александар Николовски, на која треба да се разгледаат опциите и да се усвои заеднички став.

Барања и следни чекори

Откако Брисел испрати јасно „не“ за измени на правилото 90/180, превозниците од регионот почнаа интензивни меѓусебни консултации. Тие најавуваат дека ќе испратат писмо до Европската комисија со цел да побараат појаснување од образложението на одлуката, особено во делот кој се однесува на билатералните преговори и договори.

Клучното прашање на кое бараат одговор е дали долгорочна виза издадена од една земја членка на Шенген зоната ќе важи автоматски и за останатите држави од зоната. Ако одговорот на Комисијата биде негативен, носителите на транспорти најавуваат дека постои голема веројатност најавените блокади да бидат реализирани.

Од Европската комисија потврдија дека се свесни оти превозниците поради природата на работата често мора да престојуваат во Шенген подолго од 90 дена, но засега го гледаат решението преку постојните правила и билатерални договори со земјите членки, како и преку долгорочни визи. Комисијата појасни и дека новиот систем EES не го вовел ограничувањето, туку овозможува попрецизно спроведување на правилата.

Владата на Република Северна Македонија оценува дека постапките одат во позитивен правец и укажува дека во новата визна стратегија на ЕУ превозниците се препознаени како професионална категорија. Оптимално решение за проблемот Владата го гледа во билатералните договори за долгорочни работни визи, од кои некои веќе постојат, а се преговара и за дополнителни.

Превозниците од Македонија, Србија, Црна Гора и Босна и Херцеговина најавија дека ќе ги блокираат граничните премини од 14 септември доколку претходно не се најде прифатливо решение.

Огнен Чанчаревиќ

Фото: прес-материјал од настанот