Transportuesit në bisedime me Qeverinë — bllokada kufitare të mundshme nga 14 shtatori

Transportuesit nga Maqedonia e Veriut janë në komunikim të vazhdueshëm me Qeverinë për të sqaruar se çfarë mund të presin nga Brukseli lidhur me një lehtësim të mundshëm të rregullës Schengen 90/180, dhe më pas do të vendosin nëse do të zhvillojnë bllokadat kufitare të paralajmëruara.

Është parashikuar një takim këtë javë mes transportuesve dhe zëvendëskryeministrit Aleksandar Nikolovski, ku pritet të përcaktohen hapat e mëtejshëm dhe një qëndrim i përbashkët.

Kërkesat dhe hapat e rradhës

Pas përgjigjes së qartë të Brukselit "jo" për ndryshime të rregullës 90/180, transportuesit në rajon intensifikuan konsultimet e brendshme. Ata planifikojnë të dërgojnë një letër te Komisioni Evropian për të kërkuar sqarime mbi arsyetimin e vendimit, sidomos për ndikimin në negociatat dhe marrëveshjet dypalëshe.

Një çështje kyçe për të cilën kërkojnë përgjigje është nëse një vizë afatgjatë e lëshuar nga një shtet Schengen do të njihet automatikisht në tërë zonën Schengen. Transportuesit thonë se nëse përgjigjja e Komisionit është negative, janë të mëdha shanset që bllokadat e paralajmëruara të realizohen.

Komisioni Evropian ka pranuar se për shkak të natyrës së punës, profesionistët e transportit shpesh duhet të qëndrojnë në zonën Schengen më shumë se 90 ditë. Për momentin, Komisioni sheh zgjidhjen te rregullat ekzistuese dhe marrëveshjet dypalëshe me shtetet anëtare, si dhe thekson vizat afatgjata si zgjidhjen e preferuar. Po ashtu sqaroi se sistemi i ri Entry/Exit (EES) nuk ka krijuar kufizimin, por mundëson zbatim më të saktë të tij.

Qeveria e Maqedonisë së Veriut thotë se procesi po ecën në drejtim pozitiv dhe thekson se strategjia e re e vizave e BE-së i njeh transportuesit si kategori profesionale. Shkupi nënvizon se marrëveshjet dypalëshe për viza pune afatgjata me disa shtete Schengen janë zgjidhja më e përshtatshme, ndërsa po negociohen edhe marrëveshje të reja.

Organizatat e transportuesve nga Maqedonia e Veriut, Serbia, Mali i Zi dhe Bosnje e Hercegovina kanë njoftuar se do të bllokojnë pikat kufitare duke nisur nga 14 shtatori, nëse para asaj date nuk gjendet një zgjidhje.

Ognen Chancharevic

Foto: material shtypi nga ngjarja