Работата на Македонците во Германија виси на конец
Лидерот на конфедерацијата предупредува на пад на инвестициите и губење на работни места; голем број Македонци работат во засегнатите занаети.

Состојбата во германското занаетчиство добива алармантни размери и може да значи загуба на илјадници работни места — меѓу нив и за голем број македонски работници во земјата, предупредуваат раководните лица од секторот.
Како го објаснуваат ризикот
Претседателот на Германската конфедерација на занаетчиството, Јерг Дитрих, посочува дека деловната клима и инвестициите се намалиле до загрижувачки нивои. „Индексот на деловната клима падна на нивото од времето на пандемијата, додека инвестициите се на нивото забележано за време на светската финансиска криза“, изјави Дитрих за медиумите од групацијата „Функе“.
Дитрих предупредува дека, доколку не се преземат итни мерки за подобрување на условите за работа, секторот може да продолжи да губи меѓу 70.000 и 80.000 работни места годишно. Тој додава дека во изминатите две години веќе се изгубени повеќе од 150.000 работни позиции во занаетчиските компании.
Растечките трошоци за работа и опаѓачката побарувачка ги притискаат малите и средните претпријатија, па голем дел од нив се принудени да ги затворат своите работилници. „Многу сопственици на претпријатија се обесхрабрени, додека на други едноставно им недостигаат средства, поради што се принудени да ги затвораат своите работилници. Овој процес го опишувам како тивка смрт на претпријатијата“, порача Дитрих, додавајќи дека покачените трошоци за живот директно ја намалуваат потрошувачката на услуги.
Меѓу главните барања што конфедерацијата ги поставува се намалување на придонесите поврзани со платите и исполнување на ветувањето за намалување на данокот на електричната енергија за занаетчискиот сектор. „Односот кон занаетчискиот сектор е сè освен достоинствен“, предупреди тој и укажа дека дури и програмите за стручно оспособување се соочуваат со ризик од намалување на поддршката.
Занаетчиството во Германија ги опфаќа повеќе од 130 различни занимања — од градежништво, метална и електроиндустрија, обработка на дрво и пластика до текстил, производство на храна и услуги за здравје и нега. Токму во овие гранки работат илјадници македонски државјани, па постои легитимна загриженост дека при масовни отпуштања тие би можеле да бидат меѓу првите погодени.
Фото: Илустрација (АИ)


