Ревизија: Со сегашен број инспектори ќе се чека 55 години за контрола на сите правни субјекти

Ревизорот утврдил дека системот за цивилна заштита не функционира како интегриран механизам кој може навремено да одговори на катастрофи, а инспекцискиот надзор е ограничен со недоволен кадар.

Инспекции и бројки. Во текот на годината се реализираат до 1.300 надзори со 14 до 17 инспектори. „Во февруари 2026 година ДЗС доставила информација до Владата во која е укажано дека со постојниот начин на работа и просечно извршување на околу 1.300 надзори годишно, би биле потребни приближно 55 години за контрола на сите правни субјекти. За редовен и контролен инспекциски надзор еднаш годишно, согласно проценката на ДЗС, потребни би биле 322 инспектори , при 72.181 активни претпријатија“, пишува во Ревизорскиот извештај.

Пожари, штети и опрема

Ревизорите посочуваат дека пожарите на отворен простор се повторуваат секоја година. Во 2024 година изгореле околу 100.000 хектари — рекорд за последните десет години и површина активна колку приближно шест години наназад. Штетата за 2024 се проценува на 83 милиони евра, а вкупната штета изнесувала 140 милиони евра во периодот 2023–2025 година. За ер‑тракторите во истиот период ДЗС потрошила 2,5 милиони евра за сервисирање, набавка на резервни делови и осигурување.

Директорот на ДЗС, Стојанче Ангелов, вели дека летово ер‑тракторите биле сервисирани и пуштени во функција навремено, дека бројот на противпожарни возила и на доброволни единици се зголемил и дека сите сили може да се ангажираат по однапред донесена одлука.

„Ова лето немаше потреба од барање на меѓународна помош . Напротив , за прв пат од постоењето , ДЗС во Европскиот механизам за заштита и спасување декларираше два ер трактора за помош на други земји . Ова лето Македонија најуспешно досега се справи со пожарите на отворен простор“, вели Стојанче Ангелов – директор на ДЗС.

Ревизорите предлагаат донесување Национална стратегија, јасна институционална рамка, стабилно финансирање, зајакнување на капацитетите и воспоставување ефикасен систем за мониторинг и надзор за да се отстранат идентификуваните слабости.

Фото: прес-материјал од настанот