СДММ: студентите во „Стив Наумов“ живеат во лоши услови и бараат оброк од 200 денари

Социјалдемократската младина на Македонија (СДММ) денеска упати критики до властите дека со вториот ребаланс на буџетот се скратени средства за образование и енергетски ефикасна рехабилитација на студентските домови, додека студентите во домот „Стив Наумов“ се жалат на неприфатливи услови за живот.

Протекување плафони, нема греење и пукнат бојлер само еден месец по реконструкцијата

Од СДММ наведуваат дека само еден месец по реконструкцијата во „Стив Наумов“ има протекување од плафони, отсуство на греење и топла вода, влага во собите и пукнат бојлер. Истовремено, посочија дека партиципацијата за сместување е зголемена на 6 600 денари месечно.

На прес-конференција, претседателката на СДММ, Стефанија Кузмановска, го постави прашањето зошто студентите плаќаат повеќе ако условите не се сменети. Таа рече: „Ова ли е домот од А-категорија што го ветуваа Јаневска и Мицкоски? За што плаќаат студентите 6 600 денари месечно? За дефекти во домот што требаше да биде целосно реновиран. Студентите не добија ништо, ниту достоинствени услови за живот, ниту повисок студентски оброк“.

Кузмановска додаде дека при последната хаварија со бојлерот, за среќа, немало повредени.

Покрај барањата за итни поправки, СДММ инсистира на зголемување на студентскиот оброк од сегашните 140 на 200 денари, наведувајќи дека тоа е минимум за пристоен и здрав оброк. Од организацијата го обвинија премиерот за занемарување на потребите на младите и за ненаменско трошење на буџетските средства.

„Мицкоски нема пари за младите, затоа што ги троши за своите криминални тендери. Студентите заслужуваат достоинствен живот“, додаде таа.

Платформата „Студентарија“ на својата Инстаграм-страница објави неколку видеа на кои, според нејзините тврдења, се прикажани проблемите во „Стив Наумов“; оттаму велат дека освен едно видео снимено пред неколку дена, сите останати се направени вчера вечерта.

Фото: прес-материјал од настанот