СДСМ: Цените растат, минималната плата останува 26.000 денари

Опозицискиот СДСМ обвинува дека Владата предводена од Христијан Мицкоски не презема мерки за заштита на животниот стандард на граѓаните, додека трошоците за живот и цените продолжуваат да растат.

Во соопштението партијата наведува дека октомвриската синдикална минимална кошничка надминува 70.000 денари, а со трошоците за кирија достигнува речиси 90.000 денари. Според СДСМ, од почетокот на годината трошоците за живот се зголемиле за 4.000 денари, додека минималната плата останува 26.000 денари.

Работници и земјоделци во фокусот на критиките

Од партијата тврдат дека околу 180.000 работници примаат плата пониска од 31.200 денари месечно и дека ниту три минимални плати не се доволни за покривање на основните трошоци на едно семејство. СДСМ додава дека Владата ги одбила нивните предлози за минимална плата од 600 евра и поддршка за земјоделците.

Опозицијата предупредува и на нови поскапувања од јануари следната година, вклучително и повисоки сметки за електрична енергија и парно. Партијата ја критикува и постапката за ребалансот на буџетот, конкретно отсуството на предвидена повисока минимална плата, мерки за ограничување на поскапувањата и дополнителна помош за земјоделците.

„И со новиот ребаланс повторно исто: нема повисока минимална плата, нема мерки против поскапувањата, нема помош за земјоделците. Има нови долгови и високи камати, чија сметка ќе ја плаќаат граѓаните и идните генерации. За само две години Мицкоски го зголеми долгот за 4 милијарди евра, половина од вкупниот досегашен долг на државата.  Долг врз долг, ребаланс врз ребаланс – а за народот нема пари, граѓаните сè потешко живеат“, наведува опозициската партија во соопштението.

СДСМ заклучува дека зголемувањето на задолжувањето и растот на каматите ќе имаат долгорочни последици по стандардот на домаќинствата и повика итни мерки за финансиска поддршка на ранливите групи.

Фото: прес-материјал од настанот