СДСМ: Медиуми блиски до Мицкоски ја спонзорираат платформата „ЗНАМ 2.0“

СДСМ обвини дека медиуми и коментатори, кои партијата ги поврзува со лидерот на ВМРО‑ДПМНЕ Христијан Мицкоски, медиумски ја поддржуваат платформата составена од актуелни и поранешни функционери на СДСМ, именувана како „ЗНАМ 2.0“.

На брифингот во четврток Богдана Кузевска, портпаролка и членка на Извршниот одбор на СДСМ, рече дека зад иницијативата стои медиумска мрежа која таа ја поврзува со странски и домашни политички чинители. „Ги открија сите карти. Орбановите и медиумите на Вучиќ во Македонија. Таканаречени независни аналитичари како ВМРО-овецот Јове Кекеновски. Соработници на БИА. Геро, Ивона, Латас по социјални мрежи. Ботови на СНС. Трол-фарми преку израелска фирма. Затоа и министрите од ЗНАМ 1.0 јавно им даваат поддршка. ЗНАМ 1.0 со јавна поддршка за на ЗНАМ 2.0. Сите заедно против единствениот бастион на слободата – СДСМ. Сите заедно против Филипче, кој секој ден се бори против оваа банда, на терен, со граѓаните, со народот што едвај го врзува крајот со крајот“, рече Кузевска.

Тврдења, документи и закажан состанок

Од СДСМ објавија примероци од повеќе онлајн известувања кои ја следеа активноста на платформата и наведоа дека основачите добиле договори по јавни набавки. Кузевска кажа дека „граѓаните сега имаат црно на бело“ и ја наведе сумата: „Тендери за основачите на Платформата „за иднината на Мицкоски“. 1,6 милиони евра. Помалку од Гета. Повеќе од нивната чест. Нема да помине. Готово е со дефокусот. Со лагите. Со црните кампањи. Со Дубаи и Харис Џиновиќ. Доаѓа време на вистина и правда. Сите ќе одговараат. Власта ќе ја вратиме во рацете на граѓаните“, изјави Кузевска.

Претставници на демократската платформа — Гордан Георгиев, Андреј Петров, Славјанка Петровска, Игор Ивановски, Никола Ќуркчиев и Емилијан Станковиќ — на свој брифинг истакнаа дека нема да формираат нова политичка партија и нема да поднесуваат независни листи за парламентарните избори. Тие рекоа дека целта е почеток на разговори за обединување на опозицискиот фронт и победа над актуелната власт. Новата рунда разговори им е закажана за денеска во 12:05 часот.

Лидерот на СДСМ, Венко Филипче, жестоко реагира и ги обвинува луѓето зад платформата дека сакаат со пуч да ја преземат партијата. „Луѓето зад платформата сакаат со пуч да го преземат СДСМ, но нема да им помине“, рече Филипче.

Од ВМРО‑ДПМНЕ, пак, порачаа дека за нив нема подобро решение од тоа Филипче да биде претседател на СДСМ — констатирање што дополнително го отсликува нивото на внатрепартиски и опозициски тензии.

Фото: прес-материјал од настанот