СДСМ: Мицкоски призна дека тој ги контролира институциите што гонеа и апсеа

Опозициониот Социјалдемократски сојуз (СДСМ) денеска обвини дека премиерот Христијан Мицкоски со своите изјави за одлуките на Врховниот суд јавно признава дека ги контролира институциите кои гонеа и апсеа, откако Врховниот суд го укина решението за случајот „Ласкарци“ и пресудите за поранешниот градоначалник на Општина Карпош, Стевчо Јакимовски.

Од партијата велат дека изјавите на Мицкоски се уште еден јасен доказ дека Обвинителството, судовите, Агенцијата за национална безбедност (АНБ) и полицијата де-факто се ставени под негова контрола.

Во соопштението СДСМ ја цитираше неговата изјава и ја толкува како признание: „Тој повеќе ниту се крие. Тоа го кажува јавно-на телевизија, во Собрание, каде сака. Премиерот не е обвинител. Премиерот не е судија. Премиерот не е полициски инспектор. Но, Мицкоски јавно признава дека ‘тие‘ бркаат и затвораат, а ‘другите‘ (повторно тие) пуштаат“.

Реакции и што се случи во Врховниот суд

Партијата побара итно враќање на независноста на Обвинителството и судството и оцени дека „правдата е селективна“ и дека институциите се инструмент на политичката волја. „Кога сакаат-гонат. Кога сакаат-се оградуваат. Кога сакаат-пуштаат, затвораат. Ова е владеење на една организирана криминална група што ги зароби институциите и јавно се фали со тоа“, стои во соопштението.

Мицкоски пак денеска ги оцени одлуките на Врховниот суд како „уште едно големо разочарување“ и рече дека укинувањето на пресудите е разочарување и за граѓаните. Тој укинувањето на пресудите на Апелација им го припиша на остатоците од претходните влади на СДСМ и ДУИ во правосудството и ги повика европските колеги да ги следат овие примери и да ја согледаат состојбата.

Вчера Врховниот суд соопшти дека Советот за казниви дела ја укинал пресудата на Апелацискиот суд Скопје со која на дел од осудените во случајот „Ласкарци“ им беа зголемени казните. Исто така, кај Стевчо Јакимовски беа укинати пресудите на Основниот кривичен суд Скопје и на Апелацискиот суд Скопје откако Советот го уважил барањето за вонредно преиспитување кое било поднесено преку неговиот бранител, адвокатот Виктор Светковски од Куманово.

Фото: прес-материјал од настанот