СДСМ: Обвинителство мора да отвори истрага за лотото и трошењето од 340 милиони денари

Социјалдемократскиот сојуз (СДСМ) побара Јавното обвинителство веднаш да отвори истрага и да ја обезбеди целокупната документација за, како што наведе партијата, нетранспарентното трошење на 340 милиони денари (околу 5,5 милиони евра) од Државната лотарија за прославата на Денот на независноста на која настапи Дејвид Гета.

На прес‑конференција пред зградата на Обвинителството, портпаролката и членка на Извршен одбор на СДСМ, Богданка Кузеска, обвини дека властите кријат документи, одлуки, анекси и фактури од граѓаните и дека начинот на носење одлуки е сомнителен и спротивен на закон.

Кузеска ги постави следните прашања кои, според СДСМ, треба да се расчистат: „Во кое својство Владата ѝ наложила на Државната лотарија да го финансира настанот и каде е одлуката на Собранието на акционери за трошење на над 300 милиони денари?“

Јавниот повик, плаќањата и билети под лупа

Партијата укажа дека јавниот повик траел само пет работни дена и пристигнала една понуда; повикот завршил на 8 мај, а по три дена веќе бил најавен настапот на Гета. СДСМ оценува дека тоа укажува на однапред приспособени услови за конкретен организатор.

Кузеска рече дека Обвинителството треба да утврди колку точно чинел настапот на Гета, кои фирми ги добиле парите и каде се вршеле исплатите кон „Стардаст“ односно „Авалон“ додека компанијата имала блокирана сметка. Партијата бара и објаснување каде завршиле околу 1.750.000 денари од продадените билети и дали е платен соодветен данок.

Таа го оцени првичниот став на премиерот Христијан Мицкоски дека прославата чини „нула денари“ како директно манипулирање со јавноста и додаде: „Да се утврди каде завршил секој денар. Народот не е ниту ’талог’, ниту ’идиот’. Не може постојано да го лажете и да ги криете одговори за неговите пари.“

Освен Јавното обвинителство, СДСМ упати повик и до Државната комисија за спречување на корупцијата и до Државниот завод за ревизија за итно постапување и целосно расчистување на случајот и утврдување на одговорност.

Минатата недела владината портпаролка и членка на Извршниот комитет на ВМРО‑ДПМНЕ, Марија Митева, соопшти дека вкупната прослава на Денот на независноста — која опфати повеќе настани во текот на речиси еден месец, кулминирајќи со настапот на францускиот диџеј Дејвид Гета на Националната арена „Тодор Проески“ — чинела 340 милиони денари.

Како што посочи Митева, главнината, односно 300 милиони денари, била обезбедена од нераспределената добивка на Лотаријата предвидена за 2024 година, додека преостанатите 40 милиони денари биле од општествено одговорни компании. Директорот на Државна лотарија, Александар Климовски, изјави дека лотаријата е посебен правен субјект и дека средствата од нераспределена добивка се нејзини пари, а не буџетски.

Фото: СДСМ