СДСМ за предлозите од Платформата: Тоа е програма ЗНАМ 2.0 за разбивање на опозицијата, партијата не е на продажба
Партијата тврди дека предлогот нема антикорупциски мерки и го оценува како обид за преземање на опозицијата.
Социјалдемократскиот сојуз на Македонија (СДСМ) излезе со брза реакција по доставувањето на серија реформски предлози од страна на Платформата „Разговори за иднината во 12:05“ во партиската архива на улицата Бихаќска.
СДСМ: тоа е програма „ЗНАМ 2.0“, целта е разбивање на опозицијата
Од партијата велат дека наместо доверлив третман, содржината на писмото веднаш била објавена во медиуми блиски до власта. СДСМ го оцени предлогот не како план за реформи туку како обид за преземање и слабеење на опозицискиот фронт и го нарече „ЗНАМ 2.0“.
Раководството посочува дека 17 потписници се обидуваат да ја наметнат својата волја спротивно на над 18 000 членови кои гласале за актуелниот претседател Венко Филипче. Иницијаторите, според партијата, имаат лични сметки, финансиски интереси и обиди за коалирање со други политички актери со цел расцепкување на опозицијата по примерот на партијата ЗНАМ.
СДСМ истакнува дека во понудениот документ нема конкретни антикорупциски мерки, рокови за ЕУ‑интеграциите ниту поддршка за Европското јавно обвинителство, туку само барања за оставки, свикување нов конгрес и промена на партиското лого.
Порачаа од партијата, одбивајќи го писмото поднесено од Платформата: "Партијата не е на продажба и СДСМ не се предава на аванс. За нас СДСМ не вреди 1,6 милиони евра. Ние сме за Европа, за вистина и правда. Слободата на говорот, слободата на медиумите, демократијата, европскиот пат и иднината на нашата Македонија немаат цена".
Платформата „Разговори за иднината во 12:05“ преку објава на својата Facebook‑страница потврди дека предлозите ги доставиле Игор Ивановски, Славјанка Петровска и Коста Начевски во партиската архива.
Фото: прес-материјал од настанот
