Се обновува видиковецот под врвот Стив на Пелистер, ќе се ставаат и нови содржини на Јоргов Камен и Црвени Стени

Започна обнова на дрвената конструкција на видиковецот на околу 2.000 метри надморска височина, под врвот Стив на Пелистер. Конструкцијата, која овозможува широк поглед кон околината и градот, со години беше во руина и неодамна беше прогласена за небезбедна и забранета за користење.

Обнова и нови содржини

Акциите за санација ги презеде Националниот парк „Пелистер“ и Ротари клубот „Битола Широк Сокак“. Предвидено е да се замени и зацврсти дрвената конструкција за да видиковецот повторно може безбедно да се искачува.

Градежните материјали се пренесуваат со коњи, поради тешката пристапност и чувствителноста на планинскиот терен, што овозможува работа без употреба на тешка механизација.

Одговорните најавуваат дека интервенцијата ќе резултира со обновена дрвена конструкција која ќе ги задоволи безбедносните стандарди, а дополнително ќе се поставуваат и нови содржини на Јоргов Камен и Црвени Стени за подобрување на посетителското искуство.

Проектот има за цел да го отвори повторно едно од најпосетуваните места на Пелистер и да ги намали ризиците за планинарите и туристите кои го користеа руинираниот видиковец пред забраната.

Фото: СДК.МК)