Шесто издание на „Скопје ер фер 2026“ се одржува денеска во Градскиот парк

Шестото издание на воздухопловно-едукативниот саем „Скопје ер фер 2026“ се одржува денеска, 24 октомври 2026 година, во Градскиот парк во Скопје, во реонот наречен „Вембли“. Организаторот истакнува дека целта е да го приближи воздухопловството до пошироката јавност, особено до младите кои бараат можности за образование и кариера.

Практични демонстрации и меѓународно учество

Настанот го организира Здружението за подобро воздухопловство „Авикон“ и започнува во 11:00 часот. Посетителите ќе може да видат статични изложби и да разговараат со претставници на авиокомпании, компании за одржување, образовни установи, аероклубови и професионални здруженија од земјава и од странство.

"-Сакаме да ги скршиме сите стереотипи поврзани со воздухопловството – дека тоа е апстрактно, недостижно или резервирано за одредени луѓе со врски. Воздухопловството е отворено, динамично и нуди бројни реални кариерни можности - порачуваат од „Авикон“."

На саемот ќе учествуваат ТАВ Македонија, „Виз ер“, Европскиот авијациски институт (Romania), Воздухопловната академија од Белград, Global Aviation (Грција), Global Maintenance (Бугарија), Здружението на контролори на летање, Здружението на воздухопловни метеоролози, Воздухопловната федерација на Македонија, Аероклуб Скопје, Дирекцијата за заштита и спасување, Воената академија „Генерал Михаило Апостолски“ и други организации.

Еден од експонатите ќе биде хеликоптер од Хеликоптерската единица „Јастреби“ при Министерството за внатрешни работи. Од „Авикон“ ги повикуваат учениците, студентите, љубителите на технологијата и сите заинтересирани граѓани да присуствуваат на настанот.

Организаторите нагласуваат дека саемот е единствен од ваков тип во регионот и дека претставува практична можност за млади луѓе да се запознаат со образовните и професионалните патеки во воздухопловството.

Фото: прес-материјал од настанот