Силна бура и свлечиште во северозападна Шпанија — загинаа две жени, две бебиња повредени

Поплава и свлечиште предизвикани од поројни дождови вчера го погодија мало село во северозападна Шпанија и усмртија две повозрасни жени, а повредија две бебиња, соопштија регионалните служби.

„Потврдена е смртта на две жени, на возраст од околу 60 и 80 години“, соопштија итните служби на регионот Кастиља и Леон, додавајќи дека двете бебиња биле згрижени поради модринки. Маж над 80 години, кој претходно беше пријавен како исчезнат, бил пронајден неповреден.

На местото беа испратени пожарникари, полиција, екипи на Итната медицинска помош и припадници на Цивилната гарда. Снимките од спасувачки хеликоптер покажуваат дека селото е опкружено со ридест и пошумен терен.

Камења и кал затрупаа барем едно возило

Локалните медиуми објавија фотографии на кои се гледа сива маса од камења и кал што поминала низ селото и целосно затрупала автомобил. Во соопштението стои дека поплавата се случила за време на државен празник.

Градоначалникот на блиската Понферада, Марко Морала, пред новинарите изјави дека „силните бури во ридовите предизвикале голем нанос од камења, кал и тиња“, и додаде дека невремето предизвикало материјална штета и во соседното село Бусас.

Несреќата доаѓа во период кога Шпанија со недели се соочува со екстремни временски непогодности од спротивен тип — топлотни бранови и шумски пожари. Покраината Леон, каде се наоѓа Мансанедо де Валдуеса, во 2025 година беше погодена од некои од најтешките шумски пожари во земјата; таа година беше рекордна според бројот на изгорени хектари, според Европскиот информациски систем за шумски пожари.

Екипите за спасување останаа на терен за да им помогнат на жителите и да ја проценат штетата.

Фото: Принтскрин / Франс њуз 24