Скопје го одбележува 82-годишнината од ослободувањето
Одбележување на 13 ноември 1944 со потсетување на жестоките улични борби и загубите во градот.
Скопје го одбележува 82-от роденден на слободата — на 13 ноември 1944 година, по неколкудневни жестоки улични борби, единиците на народноослободителните сили го ослободија градот од фашистичката окупација и Скопје ја дочекаат посакуваната слобода.
Битки по скопските улици и висока цена
Во завршната операција учествуваа борците од 42-та и 50-та народноослободителна дивизија, заедно со 16-та македонска ударна бригада, како и Третата и Дванаесеттата македонска бригада. Голем дел од партизаните беа скопјани кои ги познаваа маалата и улиците, што им овозможи полесно напредување и покрај тоа што тој ноемвриски ден паѓаше слаб снег.
Најтешките судири се водеа на десниот брег на Вардар — кај Старата железничка станица, Офицерскиот дом, Народната банка, хотелот „Македонија“, како и во зградата на тогашната женска гимназија, каде што се бореше буквално по катови и по училници.
Илeгaлните групи од скопското движење на отпорот активно делуваа на терен и одиграа клучна улога во спречувањето на германските сили да го минираат и урнат Камениот мост.
Слободата беше платена со висока цена. При повлекувањето, окупаторските војници кај кејот на Вардар, веднаш до Камениот мост, стрелале деветмина недолжни цивили. Во ноемвриските борби за ослободувањето на Скопје загинале над 420 партизани и партизанки, додека во текот на целата Втора светска војна животот го загубиле околу 4.600 скопјани.
Традиционално, на овој датум Град Скопје оддава почит на паднатите борци и ги доделува престижните награди „13 Ноември“ на заслужни граѓани и институции за нивниот придонес во развојот на градот.
Фото: прес-материјал од настанот
