Со 149 милиони евра грант и кредити почнува третата фаза на пругата кон Бугарија

Третата фаза од изградбата на железничкиот Коридор 8, делницата Крива Паланка – Деве Баир, ќе започне со комбинација од грант и кредити, соопшти владата по потпишувањето на договорите за финансирање денеска. Пакетот вклучува 149 милиони евра грант од Европската Унија и по 175 милиони евра кредити од Европската инвестициона банка и од Европската банка за обнова и развој.

Договорите беа потпишани во Владата на Република Северна Македонија. Министерот за транспорт и врски, Александар Николоски, го потенцираше значењето на Коридорот 8 како еден од врвните приоритети на владата и истакна дека проектот добива смисла преку соработка со Бугарија.

Прекинатите планови за „половина тунел“ се надминати, велат од Владата

„Не беше лесно во овие две години, беше доста предизвикувачки. Особено значајно е што успеавме да постигнеме договор со Бугарија за изградба на прекуграничен железнички тунел којшто треба да ги спои двете држави и само на тој начин овој проект добива смисла. Минатата година во ноември го потпишавме договорот, а веќе минатата недела се одржа првиот меѓуресорски и меѓувладин состанок во Софија. Очекуваме на крајот на овој месец да се одржи вториот меѓувладин состанок во Скопје. Порака е таму јасна, дека двете држави испраќаат заедничко писмо до Европската Унија, европската Банка за обнова и развој и Европската инвестициска банка за обезбедување на грант-средства за изградба на прекуграничниот железнички тунел. Тоа се средства со коишто заеднички ќе може да се реализира овој проект“, рече Николоски.

Власта го опишува овој сегмент како технички сложен: на 22 километри ќе има вкупно 21 тунел и уште 52 мостови и вијадукти, бројки што го нагласуваат интензитетот на градежните работи.

Директорот на Македонски железници – Инфраструктура, Синиша Ивановски, предупреди на техничките предизвици: „Преку 60 проценти од оваа траса ќе бидат во мостови и во тунели и тоа е технолошки навистина предизвикувачко. Се работи за тешка теренска пристапност и има потреба од дополнителни геодетски, хидролошки, геолошки и геотехнички истражувања… Верувам дека во зададениот рок оваа делница ќе биде завршена и сите ние ќе бидеме сведоци дека ние како држава можеме да изведуваме сериозни и технолошко специфични капитални проекти“.

Премиерот Христијан Мицкоски нагласи дека во претходниот концепт проектот завршувал „на половина тунел“, што сега е надминато преку договорите со источниот сосед и заложбите за продолжување и модернизација до националната железница во Софија. „Требаше време. Требаше да се постигне напредок во разговорите со нашиот источен сосед, тој напредок се постигна, се потпишаа договори, имаме обврска (заложба) од двете страни и имаме тунел којшто е практично трет дел од проектот. Бидејќи, ако третата секција завршува до почетокот на тунелот, од завршувањето на тунелот до поврзувањето со националната железница во Софија имаме заложба од страна на нашиот источен сосед за јасна модернизација на тој дел од Коридорот 8 и имаме заеднички проект – тоа е тунелот којшто очекуваме да биде целосно финансиран како грант од страна на Европската комисија“, рече Мицкоски.

Првата фаза од Куманово до Бељаковце е веќе пуштена во сообраќај, а работите на втората фаза кон Крива Паланка се во тек. Со денешното финансирање се отпочнува изградбата на делот што треба да ја поврзе земјата со железничкиот коридор кон Бугарија и да ја зајакне регионалната поврзаност.

Фото: прес-материјал од настанот