Собранието го забави донесувањето на законот за заштита од пушење

Собранието ја забави постапката за новиот закон за заштита од пушење: почетокот што првично беше предвиден за 1ви март се пролонгира за седум месеци, а предлогот сè уште е заглавен меѓу амандмани и барања за дополнителни мислења.

Осум амандмани и нови мислења го стопираат законот

Предлог-законот на Владата наиде на отпор од пратениците кои поднесоа низа амандмани. Еден од предложените амандмани овозможува пушачки соби во ресторани и кафулиња.

Министерот за здравство Сашо Клековски се спротивстави на амандманите и оцени дека тие не се реални и отвораат можност за заобиколување на суштината на законот — заштитата од тутунскиот чад. "Да постојат во одредени земји пушачки соби меѓутоа тие се со такви техничко технолошки решенија, да кажам со негативен притисок што ние не успеваме во нашите оперативни сали да го постигнеме а камо ли да се постигне во ресторан или во друг простор. Сметам дека имавме продуктивен дијалог со угостителската комора, имавме продуктивен дијалог со другите чинители и чим ја имаме поддршката од нивна страна сметаме дека ова е оптимално решение," рече министерот.

Пратениците, меѓу другото, побараа дополнителни мислења од домашни експерти и од стопанствениците кои се занимаваат со производство на тутунски производи; поединечна група пратеници го побара и мислењето на Светската здравствена организација. Од комисијата велат дека постапката ќе продолжи откако ќе пристигнат сите побрани мислења.

Во меѓувреме, законот претрпе низа измени — од промена на името до ублажување на одредени строги мерки. Наместо целосна забрана во угостителските објекти, се предвидуваат посебно уредени тераси на кои ќе биде дозволено пушењето: терасите треба да имаат две отворени страни, отворен покрив и посебен влез за непушачи.

Законодавното решение не ги забранува производството, увозот, извозот и продажбата на тутунски производи и на електронски уреди — туку ја регулира нивната употреба. Предвидена е целосна забрана за пушење во затворени простори, на автобуски и железнички станици, и во автомобил ако во него има дете. Пред одредени институции пушењето ќе биде дозволено само на најмалку 20 метри оддалеченост.

Според здравствените власти, целта на законот е заштита на граѓаните од штетните влијанија од пушењето и намалување на трошоците за лекување.

Симона Петровска

Фото: прес-материјал од настанот