Струга воведува ноќни рестрикции на водата поради намалена издашност на изворите
Шум дава 130–150 л/с, Беличките извори околу 30 л/с; рестрикциите се од 23:00 до 06:00, а можни се и дополнителни ограничувања.
Струга воведува ноќни рестрикции во водоснабдувањето поради намалена издашност на изворите Шум и Беличките извори, кои веќе неколку месеци работат под просечен капацитет поради неповолни хидролошки услови.
Намалена издашност принудува на ограничување
Според мерењата, издашноста на изворот Шум се движи од 130 до 150 литри во секунда, додека Беличките извори даваат околу 30 литри во секунда. Во овие услови претпријатието секојдневно испорачува околу 6.000 кубни метри вода — максималното количество што може да се распредели во моментов.
Јованчо Мечкароски, директор на ЈП „Водовод“ Струга, предупредува дека последиците од намалувањето се чувствуваат кај повисоките згради и во подалечните рурални средини, каде што во одредени периоди притисокот е понизок.
„Во моментов, од 23 часот до 6 часот наутро имаме одредени рестрикции. Доколку продолжи овој тренд, не ја исклучуваме можноста за воведување и дополнителни рестрикции“, вели Мечкароски.
Експедициите на претпријатието секојдневно работат на санирање дефекти, намалување на загубите и откривање нелегални приклучоци за да се оптимизира распределбата на расположливите количества. Истовремено се разгледуваат можности за обезбедување алтернативни извори, но за нивна реализација се потребни значајни финансиски средства и вклучување на државните институции.
Проблемите со снабдувањето со вода во Струга се повторуваат со години и граѓаните и натаму се жалат на нередовно снабдување и слаб притисок. Во февруари годинава енормно високата матност — 28,56 НТУ при дозволена вредност од 1,5 НТУ — предизвика забрана за користење на водата за пиење во Струга и околните населени места.
Фото: СДК.МК)
