Сведоци: полицијата била пред „Пулс“ и помагала по пожарот, рекоа сведоци на одбраната

На денешното рочиште во Основниот суд во Кочани тројца сведоци предложени од одбраната изјавија дека полицајци биле присутни пред влезот на кабарето „Пулс“ и по избувнувањето на пожарот и дека потоа помагале при поместување на повредените и расчистување на влезот.

Сведоци опишаа контроли и помош на терен

Судскиот процес против 13 полициски службеници е во тек; тие се обвинети за непостапување согласно акцискиот план по трагичниот пожар во „Пулс“ во Кочани на 16 март 2025, во кој загинаа 63 лица, а над 200 беа повредени.

Првиот сведок, кој тогаш бил малолетен, кажа дека тој и пријателите излегле од дискотеката околу 1:15 часот откако келнер ги предупредил дека надвор има полиција. Тој рече дека на влезот бил сопрен од полициски службеник кој им ги зел личните податоци и дека во судницата го посочил обвинетиот Марјан Радевски.

„Токму во тој момент од внатрешноста се слушна повик дека има пожар. Некој од внатре викна дека се запалило и полицаецот ни кажа да бегаме од местото“, изјави сведокот. Тој потврди дека главната причина поради која излегле била тоа што биле малолетни и дека, доколку полицијата не била надвор, ќе останеле во објектот.

Сведокот понатаму раскажа дека по избувнувањето на пожарот слушнал луѓе како викаат да се направи простор за евакуација. „Слушнавме како некој вика ’правете место, правете место да излезат луѓе’, потоа ние викнавме такси и си заминавме“, рече тој.

Вториот сведок рече дека го забележал Радевски претходно истата вечер за време на полициска контрола во кафулето „Булевар“, а подоцна и пред билетарницата на „Пулс“. Тој опиша дека бил близу влезот кога следувала експлозија која го фрлила по скалите и дека потоа заедно со Радевски и други полицајци помогнале да се расчисти влезот и да се поместат повредените.

„Марјан бараше да го расчистиме влезот кај скалите“, рече сведокот. Тој додаде дека меѓу неговото друштво бил и тешко повреден млад човек кој подоцна бил лекуван во Шпанија; по наоѓањето на сите членови на друштвото, повредениот бил пренесен со приватно возило во Штип.

Третиот сведок потврди дека полицајците давале насоки за транспортот на преживеаните. На рочиштето се обрати и родител на една од жртвите кој потенцира дека помошта укажана по избувнувањето на пожарот не може да ги избрише службените пропусти што му претходеле на настанот.

„Спасувањето е реакција кога опасноста веќе настапила, а спречувањето е навремено постапување пред да бидат загрозени човечки животи. Клучните прашања се зошто воопшто било дозволено одржување концерт во објект што работел незаконски, зошто настанот не бил спречен ако не бил пријавен во МВР и дали навремено било реагирано поради пиротехниката. Очекуваме Судот да утврди кој бил должен навреме да ја спречи трагедијата во која загинаа 63 лица“, изјави родителот.

Од 13-те обвинети полициски службеници, деветмина се униформирани полициски службеници, а четворица се началници – двајца од ОВР Кочани и двајца од СВР Штип. Судењето го води судијката Фанка Јанчулева-Михаиловска, а застапник на обвинението е обвинителката Спасенка Андонова.

Фото: прес-материјал од настанот