Thomas Waitz në Shkup: Lufta kundër korrupsionit është investim në të ardhmen e vendit

Deputeti i Parlamentit Evropian dhe raportuesi për Maqedoninë e Veriut, Thomas Waitz, u shpreh para deputetëve në seancën e parë të Komitetit të Përbashkët Parlamentar BE – Maqedoni e Veriut se lufta kundër korrupsionit nuk është vetëm një kusht për anëtarësim në BE, por kryesisht një investim në besimin e qytetarëve dhe të ardhmen e vendit.

Waitz paralajmëroi se mungesa e besimit te institucionet dhe drejtësia e dobët nxit emigrimin e të rinjve dhe dëmton perspektivat afatgjata të zhvillimit.

Si shembull ai përmendi rastet nga Austria, duke theksuar se korrupsioni ekziston edhe në shtetet anëtare, por se dallimi është mënyra se si reagojnë institucionet.

"Nëse nuk mund t'u siguroni qytetarëve se drejtësia ekziston për të gjithë, ata kanë arsye të largohen"

„Të gjitha shtetet anëtare të BE-së luftojnë korrupsionin, asnjë anëtare nuk është e përsosur. Ne luftojmë për të forcuar sundimin e ligjit, por ka dallime mes nesh. Në vende të ndryshme anëtare ka nivele të ndryshme të korrupsionit. Edhe në Austri time ka raste të mëdha korrupsioni, por diferenca është se shumë të pasur qëndrojnë në burg“, tha Waitz, duke vënë në dukje se arrestimet dhe ndjekjet penalë në Austri rritën menjëherë besimin e qytetarëve në institucionet.

Duke iu referuar Axhendës për Reforma, ai kërkoi përshpejtim të reformave të sistemit gjyqësor dhe ndryshime në Kodin Penal, që Maqedonia e Veriut të mund të përfitojë nga mekanizmat e mbështetjes evropiane. „Nëse një shtet nuk i zbaton reformat në kohë, ato para shkojnë te vendet fqinje. Sa jam i informuar, keni një shans real të merrni fonde të konsiderueshme shtesë, ndoshta 70–80 milionë euro. Por nuk bëhet fjalë vetëm për paratë. Ju duhet t'u shërbeni qytetarëve me një sistem që është jo vetëm efikas, por edhe krijon besim te popullsia“, tha Waitz.

Ambasadori i BE-së, Michalis Rokas, përgëzoi përputhshmërinë e Maqedonisë së Veriut me politikën e jashtme dhe të sigurisë të BE-së dhe rolin e saj aktiv në NATO. Ambasadori irlandez Brendan Ward, përfaqësues i presidencës së Këshillit të BE-së, e konsideroi zgjerimin si një investim strategjik dhe i bëri thirrje partive të punojnë për konsensus të përbashkët. Rokas vuri në dukje se hapja e negociatave për klasterin "Fundamentals" kërkon hapa të mëtejshëm, përfshirë përfshirjen e bullgarëve në Kushtetutë dhe mbështetje parlamentare.

Foto: MIA