Тошковски најави мобилни камери во полициските возила за снимање сообраќајни прекршоци

Министерот за внатрешни работи Панче Тошковски најави дека, покрај стационарните камери од проектот „Сејф сити“ на патиштата, во иднина сообраќајните прекршоци ќе се откриваат и со помош на мобилни уреди поставени во полициските возила.

Како ќе работи контролата

Тошковски посочи дека голем дел од возниот парк на МВР, вклучително и цивилните полициски автомобили, ќе биде опремен со уреди за автоматско евидентирање прекршоци, меѓу кои и непочитување на ограничувањето на брзината. Целта, рече тој, е да се спречи возачите да ја прилагодуваат брзината само на местата каде што има камери, а да ги прекршуваат правилата на други делници.

„Во иднина голем број од полициските возила, вклучително и цивилните, ќе бидат опремени со уреди со кои ќе може да се констатираат неколку прекршоци“, изјави министерот.

Според најавата, прекршоците утврдени со помош на овие уреди ќе се евидентираат директно во дигиталниот систем на МВР, што ќе го отежни предвидувањето каде може да наидат на опремено полициско возило.

Засега не е соопштено колку возила ќе ја добијат новата опрема и од кога таа ќе почне да се применува. Од МВР очекуваат дека мобилниот надзор ќе придонесе за поголемо почитување на сообраќајните правила и за зголемување на безбедноста на патиштата во Македонија.

Фото: прес-материјал од настанот