Тошковски: Полицијата ќе премине од тефтери на дигитален систем во рок од три до четири месеци
Министерот за внатрешни работи најави дека рачното водење полиција ќе биде заменето со електронско внесување и обработка на податоците.
Министерството за внатрешни работи во наредните три до четири месеци очекува да го реализира преодот од рачно водени полициски евиденции во тефтери кон дигитално внесување и обработка на податоците, изјави денеска министерот Панче Тошковски на брифинг со новинари. Процесот на дигитализација трае повеќе од две години и е во завршна фаза.
Исто име, повеќе книги: како се водат случаите
Тошковски посочи дека голем дел од полициските евиденции сè уште се водат рачно и оцени дека таквиот начин на работа не е соодветен за 2026 година. Тој објасни дека истите лични податоци за едно лице се внесуваат во повеќе различни книги, зависно од карактерот на настанот.
„Дали знаете како се запишува и се евидентира кривичноправен настан во Македонија во 2026 година? Со тефтер. Во моментот имаме 36 евиденции, односно книги, а претходно биле 70-ина“, рече тој.
За да го илустрира начинот на кој функционира системот, министерот даде хипотетичен пример на семејно насилство: ако лице пријави дека е нападнато од сопругата со земјоделски алат, податоците треба да се внесат во посебни евиденции за кривичноправен настан, семејно насилство, телесни повреди и присуство на малолетници; ако се спомене и оружје, се отвора уште една евиденција.
Тошковски кажа дека се запознал со системот пред две години и три месеци и опиша дека податоците досега се чуваат во архивски ормани, па службениците морале рачно да ги пребаруваат книгите кога им биле потребни информации. „На моето прашање што правите со евиденцијата, ми покажаа плакар во кој се чуваат книгите. Ако треба некои податоци да земат, службениците ги бараат во тие евиденции“, рече тој.
Со новиот систем, полицијата ќе може електронски да ги внесува и обработува податоците, со цел да се избегне повеќекратно рачно евидентирање на истите информации. Според најавите, резултатите од процесот ќе бидат видливи во следните три до четири месеци, а модернизацијата треба да ја зголеми ефикасноста на МВР до 2027 година.
Фото: прес-материјал од настанот
