Трамп: Иранскиот остров Харг е „разбиен на парчиња“

Американскиот претседател Доналд Трамп објави на социјалните мрежи дека иранскиот енергетски центар, островот Харг, е „разбиен на парчиња“, и придружи кратко видео кое, според извештаите, најверојатно е создадено со помош на вештачка интелигенција.

Трамп не достави дополнителни докази за своето тврдење. Засега нема официјален коментар ниту од Белата куќа, ниту од американското Министерство за одбрана, а иранските власти не потврдија напад.

Агенциите посочуваат дека снимката која го следеше пораката прикажува драматични експлозии и дека, по анализа со специјален софтвер за откривање содржини генерирани со вештачка интелигенција, е заклучено дека материјалот најверојатно е вештачки произведен.

Колку е важен Харг

Островот Харг долго време е клучен за иранскиот извоз на нафта: преку него, до 28 февруари — пред почетокот на американско-израелските напади — се одвивале 90 проценти од извозот на иранска сурова нафта. Напад врз таков објект би сериозно ја нарушил енергетската трговија и би создал огромен економски притисок врз Исламската Република.

Објавата на Трамп доаѓа во време на заострени тензии во Ормуската Теснина: САД претходно изведоа напади врз ирански ракетни лансери на островот Ларак, а Техеран соопшти дека возвратил со напади врз американски воени цели во Јордан. Истовремено, иранските медиуми пренесоа соопштение на Исламската револуционерна гарда дека над Ормуската Теснина е соборено американско беспилотно летало „MQ-9“.

Фото: прес-материјал од настанот