УГД‑Штип суспендира двајца вработени поради сомнежи за манипулации со оценки
Работните односи се ставени во мирување и пристапот до електронскиот систем е одземен додека ОЈО‑Штип и МВР го истражуваат случајот; на 4 ноември им е одреден осумдневен притвор.
Универзитетот „Гоце Делчев“ – Штип (УГД) информира дека ги стави во мирување работните односи на двајца вработени и целосно им го одзеде пристапот во електронскиот систем, откако Основното јавно обвинителство – Штип поведе постапка за злоупотреба на службената положба и компјутерска измама.
Двајцата се осомничени за манипулации со испитни бодови и оценки, како и за запишување семестри за студенти кои не ја исполнувале соодветната услов.
Од УГД појаснуваат дека согласно законските прописи работните места на осомничените веднаш се ставени во мирување и дека се одземени сите системски и администраторски привилегии во електронскиот систем за студентски досиеја. Оваа мерка е на сила додека случајот не биде целосно расветлен.
Заштита на досиејата и системските записи
"Заштита на досиејата: Проверката е насочена кон ограничен број случаи поврзани со постапките за запишување на студенти, во овој контекст сакаме да ја увериме јавноста дека досиејата и евиденцијата на студентите надвор од овие случаи не се засегнати. Сите евентуално нелегитимно внесени податоци од страна на осомничените лица се предмет на истрагата и ќе бидат соодветно процесирани по завршувањето на истрагата од надлежните органи.Системска контрола: Ја информираме јавноста дека електронскиот систем на УГД поседува софистицирани дигитални механизми и записи кои ги забележуваат сите интервенции при што може да се лоцира евентуална индивидуална одговорност," се вели во соопштението на универзитетот.
УГД додава дека останува во целосна и отворена соработка со Основното јавно обвинителство и со Министерството за внатрешни работи до конечно расчистување на случајот и дека нема да дава дополнителни коментари додека постапката трае.
Универзитетот ги повикува студентите, професорите и останатите вработени слободно и анонимно да пријавуваат сомнежи за евентуална злоупотреба на службената положба. Исто така, УГД наведува дека има поставено детални информации за пријавување корупција во високото образование на својата веб-страница. На двајцата вработени на 4 ноември им е определена мерка притвор од осум дена.
Фото: прес-материјал од настанот
