UGD – Shtip pezullon dy punonjës pas hetimeve për manipulim të notave

Universiteti „Goce Delçev" – Shtip (UGD) njofton se ka pezulluar marrëdhëniet e punës dhe u ka hequr aksesin në sistemin elektronik dy punonjësve, pasi Prokuroria Themelore Publike – Shtip ka nisur procedura për keqpërdorim të detyrës dhe mashtrim kompjuterik.

Të dy punonjësit dyshohen për manipulim të pikëve dhe notave të provimeve dhe për regjistrim të semestrave për studentë që nuk kanë përmbushur kushtet përkatëse.

UGD thekson se, në përputhje me dispozitat ligjore, vendet e punës të të dy të dyshuarve janë pezulluar menjëherë dhe u janë hequr të gjitha privilegjet sistemore dhe administrative në sistemin elektronik të dosjeve studentore. Kjo masë do të mbetet në fuqi deri në zbardhjen e plotë të rastit.

Mbrojtja e dosjeve dhe kontrollet teknike

"Mbrojtja e dosjeve: Kontrolli është i përqendruar te një numër i kufizuar rastesh të lidhura me procedurat e regjistrimit të studentëve; në këtë kontekst duam t'i sigurojmë publikun se dosjet dhe regjistrimet e studentëve jashtë këtyre rasteve nuk preken. Të dhënat që eventualisht janë futur në mënyrë të paligjshme nga personat e dyshuar janë objekt i hetimit dhe do të përpunohen në mënyrë të përshtatshme pas përfundimit të hetimit nga autoritetet kompetente. Kontrolli i sistemit: Ne informojmë publikun se sistemi elektronik i UGD-s posedon mekanizma digjitale të sofistikuara dhe regjistrime që evidentojnë të gjitha ndërhyrjet dhe mundësojnë lokalizimin e një përgjegjësie individuale," njoftoi universiteti.

UGD shtoi se mbetet në bashkëpunim të plotë dhe të hapur me Prokurorinë Themelore dhe me Ministrinë e Brendshme deri në qartësimin përfundimtar të rastit dhe se nuk do të japë komente për procedurën derisa ajo është në zhvillim e sipër.

Universiteti i fton studentët, pedagogët dhe stafin që të raportojnë lirshëm dhe anonim çdo dyshim për keqpërdorim të detyrës. UGD ka vendosur informacion të detajuar mbi mënyrën e raportimit të korrupsionit në arsimin e lartë në faqen e saj të internetit. Të dy punonjësve më 4 nëntor u është caktuar masa e paraburgimit prej tetë ditësh.

Foto: material shtypi nga ngjarja