Drejtori në detyrë i Muzeut Historik – Krushevo jep dorëheqje pas xhirimeve në Makedonium

Drejtori i përkohshëm i Institucionit Kombëtar Muzeu Historik – Krushevo dorëzoi dorëheqje të pakthyeshme pasi pjesë të videoklipit të reperit nga Kosova Don Djoni u xhiruan brenda monumentit Makedonium.

Dorëheqja si akt moral, edhe pse sipas tij nuk u thye asnjë ligj

Në letrën dërguar Bordit Drejtues, drejtori në detyrë Miha Odzhaklievski shkroi se vendimi është marrë si një akt personal moral dhe etik, edhe pse, si thekson ai, në këtë rast "nuk është thyer asnjë ligj, rregullore apo akt tjetër, as nuk është vepruar në kundërshtim me ndonjë vendim të Bordit të institucionit".

Odzhaklievski pranon se procedura që ngjalli reagime ishte pjesë e një praktike tashmë të vendosur në institucion, por se kjo nuk i heq përgjegjësitë për perceptimin publik. Në dorëheqje ai shkruan: "Procedura në fjalë ishte pjesë e një praktike të tashme dhe të mëparshme të aplikuar brenda institucionit. Megjithatë, jam i vetëdijshëm se ajo që lejohet ligjërisht nuk është gjithmonë e mjaftueshme për të ruajtur nivelin më të lartë të besimit që publiku me të drejtë e pret nga një institucioni publik. Në këtë rast të veçantë, pavarësisht se nuk kishte qëllim për të shkelur ndonjë ligj, rregullore apo vendim, u bë një gabim i paqëllimshëm në vlerësimin e mënyrës se si një procedurë e caktuar mund të kuptohet nga publiku."

Monumenti Makedonium ndodhet nën përgjegjësinë e Institucionit Kombëtar Muzeu Historik – Krushevo, dhe sipas raportimeve vendi është dhënë për xhirim kundrejt shumës prej 500 eurosh.

Odzhaklievski i kërkoi falje publikut për gabimin e paqëllimshëm dhe tha se dorëheqja tregon gatishmërinë për të marrë përgjegjësi kur besimi publik vihet në dyshim. Ai shtoi: "Falja ime nuk është formalitet, por shprehje e respektit ndaj qytetarëve dhe ndaj institucionit të cilit i kam shërbyer. Unë dorëzoj dorëheqjen me ndërgjegje të pastër në lidhje me përgjegjësinë ligjore, por edhe me ndërgjegje të plotë për përgjegjësinë morale që vjen me funksionin që kam ushtruar."

Megjithatë, më herët të njëjtën ditë kryeministri Hristijan Mickoski njoftoi se do t'i kërkojë ministrit të Kulturës dhe Turizmit, Sedat Sulejmani, të shkarkojë drejtorin dhe anëtarët e Bordit Drejtues të Institucionit Kombëtar Muzeu Historik – Krushevo, nën përgjegjësinë e të cilit është edhe Makedoniumi. Mickoski i kërkoi falje qytetarëve dhe tha se objekte të tilla nuk duhet të jepen me qira për destinacione si xhirimi i këtij videoklipi.

Ministri Sulejmani tha se çështja është e ndjeshme dhe se do të shqyrtohen aspektet ligjore të xhirimit në monument.

Foto: MIA