Викенд технички прилагодувања во банките пред 9 ноември

Банките во земјава ќе спроведуваат планирани технички прилагодувања во текот на претстојниот викенд поради подготовките за примена на новите стандарди во денарскиот платен промет, кои стапуваат во сила во понеделник, 9 ноември. Во тие периоди може да се јават привремени прекини или ограничена достапност на одредени услуги, особено при извршување на платежни трансакции, соопшти Македонската банкарска асоцијација.

Што опфаќаат прилагодувањата

Според соопштението, техничките активности се поврзани со претходно најавените регулаторни измени: воведување на нови платни налози, нови шифри за намената на плаќањето и прикажување и користење на платежните сметки во ИБАН-формат.

„Целта на приспособувањата е да се обезбеди непречено спроведување на новините во секојдневното користење на платежните услуги“, наведува Македонската банкарска асоцијација.

Точните термини на техничките активности, кои услуги ќе бидат опфатени и времетраењето на евентуалните ограничувања ќе бидат објавени одделно од секоја банка до нејзините клиенти.

Асоцијацијата ги повикува граѓаните и компаниите редовно да ги следат официјалните известувања од своите банки и да ги планираат навреме плаќањата кои треба да се извршат за време на викендот.

Се нагласува дека постојните броеви на платежните сметки остануваат непроменети, а прилагодувањето на нивниот приказ и користењето во ИБАН-формат во електронското и мобилното банкарство ќе го спроведат самите банки.

Фото: прес-материјал од настанот