Qeveria krijon Komitet Kombëtar për Mbrojtjen dhe Sigurinë e Gazetarëve

Qeveria vendosi të themelojë një komitet kombëtar për mbrojtjen dhe sigurinë e gazetarëve, njoftoi zëdhënësja e kabinetit Maria Miteva në një konferencë për shtyp pasdite. Komiteti do të krijojë një mekanizëm të organizuar për koordinim midis institucioneve përgjegjëse dhe organizatave mediatike për parandalimin dhe mbrojtjen nga kërcënimet dhe sulmet ndaj gazetarëve.

Plani kombëtar i veprimit deri më 15 dhjetor

Miteva tha se detyrë e komitetit do të jetë përgatitja e një plani kombëtar veprimi për mbrojtjen dhe sigurinë e gazetarëve, së voni deri më 15 dhjetor të këtij viti, në përputhje me standardet evropiane dhe rekomandimet ndërkombëtare. Plani do të mbështetet në katër fusha kryesore: parandalimi, mbrojtja, ndjekja efikase e autorëve dhe edukimi.

Për sa i përket parandalimit, vëmendja do të vendoset te pluralizmi mediatik, mbështetja institucionale dhe dialogu me mediat. Masat për mbrojtjen parashikojnë mekanizma reagimi të shpejtë, mbrojtje policore dhe juridike, përfshirë reagim ndaj kërcënimeve në hapësirën digjitale dhe në platformat sociale.

Miteva theksoi rëndësinë e veprimeve të shpejta kur ndodhin sulme ose kërcënime: "Ne duam që kjo çështje të marrë trajtim të vazhdueshëm institucional, me detyra të qarta dhe me mekanizma konkrete për veprim. Siguria e gazetarëve nuk duhet të jetë temë vetëm kur ndodh një incident. Përkundrazi, siguria është detyrë jonë, detyrë e institucioneve që të veprojnë me kohë, të njohin rreziqet dhe të sigurojnë mbrojtje të përshtatshme", tha Miteva.

Komiteti do të angazhohet gjithashtu për hetime të shpejta dhe sanksione të përshtatshme në përputhje me kompetencat ligjore, në bashkëpunim me autoritetet kompetente. Sektori i katërt do të fokusohet në trajnime, punëtori dhe aktivitete për rritjen e vetëdijes publike mbi rëndësinë e profesionit të gazetarisë.

Në përbërje të komitetit pritet të jenë përfaqësues nga Ministria e Punëve të Brendshme, Ministria e Drejtësisë, Ministria e Transformimit Digjital, Agjencia për Shërbime Audio dhe Audiovizuale, Akademia për Gjyqtarë dhe Prokurorë Publikë, Radio‑Televizioni i Maqedonisë dhe Shoqata e Gazetarëve të Maqedonisë. Miteva gjithashtu njoftoi se komiteti do të mbështesë zbatimin kombëtar të fushatës së Këshillit të Evropës "Gazetarët janë të rëndësishëm".

Duke iu drejtuar drejtpërdrejt gazetarëve, Miteva tha: "Ju keni të drejtën të pyesni, ne kemi detyrë të përgjigjemi." Ajo shtoi se qëllimi i qeverisë është që institucionet të jenë të hapura ndaj publikut dhe që liria e shprehjes të respektohet, në mënyrë që çdo gazetar të mund të kryejë profesionin e tij në mënyrë profesionale dhe pa mbrojtje selektive.

Foto: Printskrin