Во Инфективната клиника хоспитализиран седми сомнителен случај за западнонилска треска

Во последните 24 часа на Клиниката за инфективни болести беше хоспитализирано лице на возраст од 76 години кај кое е потврдено воспаление на мозокот и мозочните обвивки од вирусно потекло и позитивна серологија во серум за вирусот западен нил. Со ова бројот на клинички сомнителни случаи се зголеми на седум, додека вкупно 10 пациенти досега имаат потврдено присуство на западнонилска треска — од кои тројца се во критична состојба на Одделот за интензивна нега и се на механичка вентилација. Сите пациенти се од Скопје.

Директорот на клиниката, д-р Фадил Цана, денеска, 4 август 2026 година, појасни дека за да се докаже невроинвазивната форма на болеста и за седмиот сомнителен случај се потребни дополнителни испитувања на цереброспиналната течност.

"Инкубацијата на болеста трае до 14 дена. Никој не може однапред да предвиди како ќе се развива болеста во поединечен организам. Тоа што се знае досега е дека најподложни на потешка форма се повозрасните лица. Сите пациенти што се хоспитализирани кај нас се постари од 60 години и имаат придружни заболувања. Постарите лица, лицата со хронични заболувања, имунокомпромитирани лица т.е. со ослабен имунитет се најподложни на потешка клиничка слика. Кај околу 80 проценти од заразените болеста поминува лесно или дури и без симптоми," додаде д-р Цана.

Од Клиниката истакнуваат дека ПЦР-технологијата не се смета за златен стандард при дијагностицирање на невроинвазивната форма на болеста, поради што пациентите се подложени на дополнителни лабораториски испитувања и сè додека нема конечна потврда се третираат како пациенти со западнонилска треска.

За состојбата на тројцата пациенти на механичка вентилација засега нема подобрување, а здравствените работници продолжуваат со мониторинг и со сите потребни испитувања за да се разјасни кои од хоспитализираните развиле невроинвазивна форма.

Фото: прес-материјал од настанот